Хойд Солонгосын удирдагч, Гуам аралд цохилт өгөх шийдвэрээ цуцалжээ. Энэ талаар “www.telegraph.co.uk” сайт мэдээллээ.
АНУ болон Хойд Солонгосын дунд үүсээд буй таагүй харилцаа түр ч гэсэн намжсан талаар Вашингтоноос мэдээллээ. Учир нь Хойд Солонгосын гурав дахь үеийн залуу удирдагч Ким Чен Ун АНУ-ын газар нутгийн нэгээхэн хэсэг болох Номхон Далайн Гуам аралд цохилт өгөх шийдвэрээ түдгэлзүүлсэн байна. Уг шийдвэрийн дараахан Цагаан ордны тэргүүн Дональд Трамп мөнхийн дайсан гэгдэж байсан Ким Чен Унд талархлаа илэрхийлсэн аж.
Трамп хэвлэлийнхэнд хандан “Ким Чен Ун тун ухаалаг бас алсыг харсан шийдвэр гаргалаа. Тэрбээр дээрх шийдвэрийг гаргаагүй байсан бол мэдээж хэрэг хоёр улсын хооронд эцэс төгсгөлгүй дайн болох байлаа” гэж мэдэгджээ. “Вашингтон, Пхеньян дайн хийхэд ганцхан алхам дутуу байгаа” талаар Америкийн хамгийн том хэвлэлийн компани “CNN” агентлаг мэдээлж, олон нийтийг айдаст автуулсан билээ.
“Гуам аралд цохилт өгөх шийдвэрээ цуцалсан” гэх мэдээллийг анхлан тус улсын төрийн мэдлийн “KCNA” агентлаг уламжлав. Тус агентлаг “Хойд Солонгосын эрх баригчдын шийдвэр. Солонгосын хойгт гамшигт мөргөлдөөн үүсэхээс сэргийлэн удирдагч шийдвэрээ цуцлахаар боллоо” гэж мэдэгджээ.
Пхеньян, Гуамыг гол байгаа болгосон нь АНУ-ын цэргийн сүр хүчтэй холбоотой юм. Уг арал дээр АНУ-ын тэнгисийн цэрэг болон тус улсын сөнөөгч онгоцууд байрлах хүчирхэг цэргийн бааз үйл ажиллагаагаа явуулдаг билээ. Гэхдээ хоёр улсын дунд үүссэн таагүй харилцааны эхлэлийг Цагаан ордны тэргүүн эхэлж тавьсан хэмээн “KCNA” агентлаг мэдээлэв.
Трамп өнгөрөгч амралтын өдөр “Хойд Солонгос дайсагнасан харилцаа, өдөөн турхирсан үйлдлээ нэн даруй зогсоохгүй бол өмнө нь хэзээ ч үзэж байгаагүй шуурган галаар цохилт өгөх болно” гэсэн юм.
Энэхүү мэдэгдлийн дараахан Пхеньян жижгэрүүлсэн цөмийн зэвсэг гарган авсан тухайгаа мэдэгдэж, АНУ-ын газар нутгийн онцгой объект болох Гуам арлыг бөмбөгдөхөө сануулсан. Хоёр өдрийн өмнө Ким Чен Ун, Гуам арлыг бөмбөгдөх төлөвлөгөөгөө баталсан тухайгаа олон улсад хандан илэрхийлэн, тун удахгүй тус бүс нутгийг газрын хөрснөөс арчина хэмээн заналхийлсэн билээ.
Трампын мэдэгдэл АНУ болон НҮБ-ын шинэ хориг Хойд Солонгосын дургүйцлийг дээд цэгт нь хүргэсэн. АНУ-ын Конгресс Хойд Солонгосын шинэ хориг тавихаар болсон билээ. Конгрессийн баталсан хоригт Трамп гарын үсэг зурсан билээ. Энэхүү хоригоос нэг өдрийн дараа НҮБ-ын Аюулгүй зөвлөлийн гишүүд 100 хувийн саналаар мөн Хойд Солонгосын эсрэг хатуу хориг тавьж, хойдуудыг гадаадын орнуудад зорчихыг хориглож, мөн гадаад дахь бүх дансыг нь царцаасан билээ.
Трампын ганцхан буруу мэдэгдэл олон улсад тааварлахын аргагүй сөрөг уур амьсгал учруулсан явдлыг Германы Гадаад хэргийн сайд НҮБ-ын хуралдааны үеэр онцлон тэмдэглээд “АНУ-ын Ерөнхийлөгч үг болон үйлдэлдээ үргэлж хянуур хандах хэрэгтэй” гэж мэдэгджээ.
Б.Дэлгэрцэцэг