Хаалттай хаалганы цаана өрнөсөн МАН-ын Удирдах зөвлөлийн хуралдааны үйл явц ил болсоор байна. УИХ, орон нутгийн сонгуулиар үнэмлэхүй ялалт байгуулж, парламент, Засгийн газраа бүрдүүлсэн МАН-ынхан Ерөнхийлөгчийн суудлыг авах туйлын хүсэлтэй байсан. Өмнөх сонгуулийн ялалтандаа эрдсэн МАН-ыг 60 тэрбумын гэх тодотголтой бичлэг хөөдсөн. Төрийн албыг зарж, борлуулж, 60 тэрбум төгрөг босгох утгатай бичлэгийн гол эзэн нь НИТХ-ын дарга Ц.Сандуй. Тиймээс Шадар сайд У.Хүрэлсүх тэргүүтэй гишүүд Нийслэлийн МАН-ын хорооны дарга Ц.Сандуйг НИТХ-ын даргаас нь огцруулах асуудлыг Удирдах зөвлөлийн хурлын үеэр хөнджээ.
Эл асуудлаар санал хураалт явуулахад МАН-ын Удирдах зөвлөлийн 11 гишүүн Ц.Сандуйг огцруулахыг дэмжсэн байна. Харин 15 хүн түүнийг хамгаалж, суудалд нь үлдээжээ. Тодруулбал, УИХ-ын дарга М.Энхболд, Ерөнхий сайд Ж.Эрдэнэбат, Засгийн газрын Хэрэг эрхлэх газрын дарга Ж.Мөнхбат, Байгаль орчин, аялал жуулчлалын сайд Д.Оюунхорол, УИХ-ын гишүүн О.Содбилэг, Г.Тэмүүлэн, Нийслэлийн Засаг дарга бөгөөд Улаанбаатар хотын Захирагч С.Батболд нар Ц.Сандуйг огцруулах шаардлагагүй гэсэн байна.
Тэднээс гадна Зам тээврийн сайд асан Н.Төмөрхүү, УИХ дахь МАН-ын бүлгийн дарга Д.Хаянхярваа, Сангийн дэд сайд Х.Булгантуяа, Батлан хамгаалахын сайд Б.Бат-Эрдэнэ, УИХ-ын гишүүн Л.Энх-Амгалан нар “60 тэрбумын” гэх бичлэгийн асуудлыг шалгах асуудал дуусаагүй, гэм буруутай эсэх талаар шүүхийн шийдвэр гараагүй тул огцруулах бодит үндэслэлгүй гэсэн байр суурийг илэрхийлсэн байна.
В.Бат