МАН-ынхан Засгийн газраа унагаах тухай яриа хэдэн өдөр үргэлжилж, УИХ-ын нэр бүхий гишүүд өнөөдөр Ерөнхий сайд Ж.Эрдэнэбатыг огцруулах саналаа өргөн барилаа. Улс орон, ард түмний эрх ашгийн төлөө ажиллагаагүй, хууль зөрчсөн гэх үндэслэлээр Ерөнхий сайдыг огцруулах гэж буйгаа МАН-ын гишүүд мэдэгдсэн. Огцруулах бичигт гарын үсэг зурсан гишүүдийн байр суурийг хүргэж байна.

УИХ-ын гишүүн Т.Аюурсайхан: Монгол төр хариуцлагатай, шударга байх ёстой

Хүүхдийн мөнгийг олгох асуудлыг хуулийн дагуу хийх бүрэн боломж байхад төсвийн хуулийг зөрчиж, Засгийн газар дангаараа шийдсэн. Сонгуулийн үеэр маш тодорхой амлалтуудыг өгч байсан. Монголыг төрд шударга ёсыг тогтоож, хариуцлагатай, эрхзүйт төрийг бий болгоно гэсэн. Гэтэл өнгөрсөн жилийн хугацаанд ийм үйл ажиллагаа явуулсангүй. Хөгжлийн банкны асуудал байна. Их хэмжээний мөнгө идсэн, шамшигдуулсан асуудлаар хэнд ч хариуцлага тооцоогүй. Монголбанкны асуудал байна. Эдийн засгийг доройтуулсан асуудалд нэг ч хариуцлага ярьсангүй.

Эдийн засгийг авч явж байгаа 5.3 хувийн өсөлтийг хангах цорын ганц аж ахуйн нэгж нь ЭТТ.  Гэтэл Ж.Эрдэнэбат ажлаа авснаасаа хойш ЭТТ-г гадныханд бүрэн ашиглуулах яриа хэлэлцээрийг явуулж, батлах гэж байсныг УИХ таслан зогсоосон. Оффшорын тухай хуулийг хэрэгжүүлэхгүй байна. Оффшорын бүс нутгийн жагсаалтыг бүтэн 4-5 сар Ерөнхий сайд батлахгүй, гацааж байна. Ард түмэн Ерөнхийлөгчийн сонгуулийн үеэр Засгийн газарт дүнгээ тавьсан. Энэ асуудлыг сунжруулах нь цаашдаа улс орны эрх ашигт хохиролтой.  Монгол төр хариуцлагатай, шударга байх ёстой. Алдаа гаргаж, ард түмнээ басамжлан доромжилж байгаа хэн боловч хуулийн хариуцлага хүлээх ёстой.

УИХ-ын гишүүн Ц.Гарамжав: Ард түмэн бидэнд дүнгээ тавьсан

УИХ-ын гишүүд Засгийн газрыг огцруулах ёстой гэсэн саналд нэгдсэн бол энэ асуудлыг УИХ биелүүлэх ёстой. Төрийн байгуулалтын байнгын хороо долоо хоногийн дотор хэлэлцэх ёстой. Үүний дараа 14 хоногийн дотор УИХ хэлэлцэж, Засгийн газрыг хэвээр үлдээх үү, шинэчлэн байгуулах уу гэдгийг шийднэ.  

Дараалсан хоёр сонгуулийн үр дүнгээс харахад бидний амлалт биелэхгүй байгаа нь харагдлаа. Ард түмэн хамгийн том шүүгч. Ард түмэн бидэнд дүнгээ тавьсан. Ард түмэн гомдолтой байна, амьдралын түвшин доройтож байна, амласан хөтөлбөрөө хэрэгжүүлж чадахгүй нь тодорхой болсон учраас үүнийг даруй зогсоох ёстой.

Би ямар нэг албан тушаал бодож, энд нэгдээгүй. Шаардлагатай бол хийнэ. Хувийн эрх ашгийн төлөө энд нэгдсэн хүн нэг ч байхгүй.

УИХ-ын гишүүн Ж.Энхбаяр: Надад ямар нэг албан тушаал, эрх мэдэл сонин биш

Маш олон хүүхэд цэцэрлэггүй, гэртээ байна. Сургууль гурван ээлжэээр хичээллэсэн хэвээр байна. Гэтэл Засгийн газрын гишүүд хувийнхаа компани руу зам тавьж, эрчим хүч татдаг. Концесс нэрээр 800 гаруй тэрбум төгрөгийг Засгийн газар дотроо хувааж, зарцуулж байгаатай эвлэрч чадахгүй. Цалин, тэтгэвэр нэмэгдээгүй.

Монгол төрийг худалдсан 60 тэрбумын шившигтэй явдал. Монголчууд төрөө мөнгөөр худалддаг бол төрд итгэдэг үнэт зүйл нуран унана. Монголын ард түмэн хаашаа хандах юм. Итгэж байсан төр нь, найдаж 65 суудал өгсөн МАН нь иргэдийн итгэлийн мөнгөөр үнэлж, зарж байгаа нь туйлын ноцтой, үндэсний язгуур эрх ашгийг зөрчсөн, төрийн эсрэг гэмт хэрэг. Үүнийг цэвэрлэх цаг нь болсон. УИХ-ын 30 гишүүн гарын үсэг зурсан нь асар том хүч. Улс орноо эрүүлжүүлж, монгол төрөө цэвэрлэж авахгүй бол ёроолгүй хямрал руу унах болно.

Би сонгуулиар сонгогчдодоо амлалт өгсөн. Би УИХ-ын гишүүнийхээ үүргийг нэр төртэй, хариуцлагатай гүйцэтгэнэ. Надад ямар нэг албан тушаал, эрх мэдэл сонин биш. 

УИХ-ын гишүүн Л.Оюун-Эрдэнэ: Зангарагтай, хүчтэй Засгийн газар байх ёстой 

65 суудалтай намын Засгийн газар гэдэг бол Үндсэн хуулийг өөрчлөх саналыг дангаараа оруулах боломжтой. Зөвхөн дөрвөн жилээр биш 20, 25 жилийн томоохон реформыг хийх, эдийн засгийн тэргүүлэх чиглэлүүдийг тодорхойлж гаргаж ирэх зэргээр маш хурдтай, далайцтай, зангарагтай, хүчтэй Засгийн газар байх ёстой байсан. Гэтэл чадаагүй. Танил, тал тохой татсан, хэсэг бүлэг хүмүүсийн хүрээнд ажилладаг болсон. Эрдэнэтийн асуудал дээр УИХ шийдвэр гаргасан. Засгийн газар өнөөдрийг хүртэл энд ямар ч үйлдэл хийгээгүй, бүтэн жил боллоо. Энд хариуцлага ярих ёстой. 

Засгийн газрын нэр бүхий 4-5 сайд 802.8 тэрбум төгрөгийн концессыг өөрсдийнхөө компани дээр авдаг. Бид АН-аас юугаараа ялгаатай юм бэ. 

В.Бат