Ерөнхийлөгчийн сонгуулийн үеэр МАН-ын нэр бүхий гишүүд намынхаа эсрэг ажилласан нэртэй болоод буй. Шадар сайд У.Хүрэлсүх өөрийн залуустайгаа нийлж, намынхаа эсрэг ажиллан, унагасан гэх ярианд УИХ-ын гишүүн Л.Оюун-Эрдэнэ хариулт өглөө.

-Шадар сайд У.Хүрэлсүх, Б.Баатар нарын утасны ярианд таны нэр дурдагдсан. Энд та тайлбар өгөх үү?

-Би гар утсыг тагнаж, чагнадаг байгууллагын хүн биш. Хоёр  хүн утсаар яриа л биз. Нэг утасны ярианаас болоод Ерөнхийлөгчийн сонгуульд унажээ гэж дүгнэж болохгүй. Баатар манай ах. Бид хоёрыг танилцахад Баттулга тэр хоёр ойрын танил байсан. Хүрэлсүх Монгол тулгатны 100 эрхэм нэвтрүүлэг нь ороод, тэд найз байсан. Тэгж ярих юм бол сонгуулийн үеэр Бүрэн зураглал нэвтрүүлэг гээд хамгийн их холбогдсон хүн М.Энхболд дарга өөрөө. М.Энхболд дарга, Баатар хоёрын утасны яриаг бас гаргаж тавь л даа.

-Та сонгуулиар намынхаа эсрэг ажилласан уу?

-МАН-ын нэг ч гишүүн эсрэг ажиллаагүй гэдгийг би хариуцлагатайгаар мэдэгдье. Амарбаясгалан генсекийн хэлдгээр хөлтэй нь хөлхөж, хөлгүй нь мөлхөж ажилласан. Ийм их хэмжээний хөрөнгө санхүү, цаг гаргасан сонгууль өмнө нь мэдэхгүй. Сонгуулийн үед бүлх залгисан мэт чимээгүй байсан нөхөд сонгуулийн дараа бүлтрэх хэрэггүй. Сонгуульд ялагдсан үндсэн шалтгаан бол УИХ-ын даргаар М.Энхболд өөрөө ажиллах болсон нь. Би анхдугаар чуулган дээр ганцаараа эсрэг санал өгч байсан. 65 суудал өгсөн ард түмний итгэл найдварыг М.Энхболд өөрөө Ерөнхий сайд болж, хариулах ёстой байсан. Гэтэл Ерөнхийлөгчийн сонгуулийг бодож, томилгоон дээр алдаа гарсан.

В.Бат