Завсрын Засгийн газартай байх нь ажлыг цалгардуулж, хариуцлагыг алдагдуулдаг. Ж.Эрдэнэбатын Засгийн газрыг огцруулж, үүрэг гүйцэтгэгчээр үргэлжлүүлж байгаа энэ ороо бусгаа цагт нийгэм, эдийн засаг савлагаатай байна.
Яам, тамгын газар, төр захиргааны байгууллагуудын ажил цалгардаж, дараагийн Засгийн газрыг байгуулагдтал цагаа бүртгүүлсэн, цалинтай амралт эдэлцгээж байна. Энэ нь төрийн албаныхны буруу биш дээдэх нь суудлаа олохгүй бол доодох нь гүйдлээ олохгүй. Дээрээс чиглэл өгөхийг хүлээсэн хэсэг аль ч төрийн байгууллагад байдаг.
Хүйтний ам наашилж хөхүүрийн ам цаашилж байгааг өглөө, оройдоо тэнгэр хангай хэлээд л байгаа. Тиймээс ургац хадлан хураалт, өвлийн бэлтгэл ажлыг хангахаар цаг нартай уралдан ажиллаж, өдөр тутам мэдээлж байх цаг үе. Гантай зуны ургац муу байгааг төр, засгийнхан ярьж байгаа ч өвлийн бэлтгэлийг явцын талаар мэдээлэл дулимаг л байна.
Өнгөрсөн нэг жилийн хугацаанд эдийн засаг 5.3 хувийн өсөлттэй гарсан гэх тоон үзүүлэлт байгаа. Гэвч энэ эерэг үзүүлэлт хөрсөн дээр бууж, иргэдэд мэдрэгдээгүй, эдийн засаг хямралтай, иргэдийн амьжиргаа дээшилсэнгүй. Уг нь шинэ төр, засаг эдийн засгийг сэргээж, төсвийн сахилга батыг сахихаар ОУВС-гийн өртгөсөн хөтөлбөрт хамрагдсан. Гурван жилийн хугацаатай хэрэгжих энэ хөтөлбөр батлагдаад эхлэл төдий байгаа. Энэ хуваарийн дагуу ОУВС-гийн дараагийн санхүүжилт орж ирэх ёстой. Гэвч Засгийн газрыг огцруулсан асуудалтай холбогдуулан ОУВС Монголын асуудлыг тодорхойгүй хугацаагаар хойшлуулахаа мэдэгдээд талаар мэдээлэл газар авлаа. Гэхдээ албаны эх сурвалжийн мэдээлж байгаагаар ОУВС-ийн захирлуудын Зөвлөлийн ээлжит хуралдааныг энэ сарын 25-ны өдөр товложээ. Харин ОУВС-гийн Монголыг хариуцсан суурин төлөөлөгч Коши Мате албан тушаалаасаа өөрчлөгдөж, энэ сарын нэгнээс эхлэн ОУВС-ийн Бүс нутгийн асуудал хариуцсан газрын Ази номхон далайн судалгааны хэлтсийн захирлаар томилогдсон байна. Тиймээс манай талыг хариуцсан шинэ эрхэм томилогдох бололтой.
Цаг үеийн нөхцөл байдлыг харгалзан үзэж УИХ дахь сөрөг хүчин АН-ын бүлгээс ээлжит бус чуулганыг яаралтай хуралдуулж, Засгийн газраа байгуулах шаардлагыг УИХ-д өргөн бариад байна. Үүнтэй зэрэгцээд энэ оны төсөвт тодотгол хийж, хүүхдийн мөнгөний санхүүжилт, концессийн гэрээг эргэн харж, шийдвэрлэх ёстой гэж сөрөг хүчин үзэж байгаа. Учир нь хүүхдийн мөнгөний санхүүжилтийг сонгуулийн үеэр төсвөөс гадуурх эх үүсвэрээр хийсэн. Мөн концессийн гэрээгээр хийгдэх ажлыг эхлүүлэхгүй бол хөрөнгө оруулалт, бүтээн байгуулалт зогсонги байдал байгаа. Эхний цас орохтой зэрэгцээд улирлын онцлогоос шалтгаан бүтээн байгуулалтын ажил зогсонги болно гэдгийг сөрөг хүчин мэдэгдэж байгаа.
Эрх баригчид сөрөг хүчний шаардлагыг хүлээн авч, ээлжит бус чуулганыг яаралтай хуралдуулах ч гонжийн жоо бололтой. Учир нь эрх баригчид МАН-ын бага хурлаа энэ сарын 25-нд хуралдуулахаар Удирдах зөвлөлийн хурлаараа товлолоо. МАН-ын Удирдах зөвлөлийн хуралдаанаар намын дарга нь Ерөнхий сайд байх шийдэлд хүрчээ. Тиймээс энэ бага хурлаар намын даргын томилогоо ч явагдах нь. Шинээр томилогдох Ерөнхий сайдыг Их хурлаараа намын даргад батламжлах аж. Харин МАН-ын Удирдах зөвлөлийн хурлаар Ерөнхий сайдад У.Хүрэлсүх, Ц.Нямдорж нарын нэр яригдсан сурагтай. Удирдах зөвлөл дараагийн Ерөнхий сайдад нэр дэвшүүлэх эрхмээ бага хуралдаа оруулж ирнэ. Эх сурвалжийн мэдээлж байгаагаар У.Хүрэлсүхийг Ерөнхий сайдад нэр дэвшүүлэхээр Удирдах зөвлөл нь шийдсэн албан бус мэдээлэл байна. Хэрвээ хотын фракцынхан дэмжвэл Ц.Нямдоржийг бага хурлын гишүүдийн дэмжлэгийг авч чадна. Учир нь хотын фракцынхан бага хурлын гишүүдийн дийлэнхийг бүрдүүлж байгаа.
Хуулиараа Засгийн газрыг огцруулснаас хойш 30 хоногийн дотор дараагийн Засгийг томилдог. Тиймээс эрх баригчид сөрөг хүчний шаардлагыг үл тоон, анхны цастай уралдан, намрын чуулганаар шинэ Засгийн газраа байгуулж их ажилдаа орох нь.
Н.Энхлэн