МАН-ын бага хурал өндөрлөж, У. Хүрэлсүх Монгол Улсын Ерөнхий сайдаар томилогдох нь тодорхой болмоц түүнтэй   оюутны танхимд тохой залган сууж байсан анд нараас нь өгсүүлээд багш нар нь, улс төрд хамт зүтгэсэн анд нар нь гээд олон хүний   хүний тархинд “ Хүрэлсүх намайг  ямар ч хамаагүй албан тушаалд томилчихгүй юм байх даа. Ямар аргаар бараагаа ч болов  харуулж уулздаг юм билээ” гэхчилэн сэрүүн зүүдлэн зарим нь нойргүй хонож буй. Улстөрчдийн хувьд ч ялгаагүй.  Зарим нь хэвлэл мэдээллийн хэрэгслээр өөрийгөө дэмжсэн, тэр л жинхэнэ улстөрч, ийм ийм эрдэм чадал , суу билэгтэй нөхөр байгаа юм  гэж ирээд л захиалгаа өгөөд бичүүлэх болж. Нөгөө заримыг  нь хөрөнгө оруулагчид, ивээн тэтгэгчид нь алсын зайнаас сойж , яриа хэлэлцээ хийгээд  эхэлчихсэн бололтойдог. Энэ бүхэн улсын их баяр наадмаар барианаас гарч буй хурдны морьдтой адил юм уу даа, янз нь.  Харин У. Хүрэлсүхийн хувьд асуудлыг өөр өнцгөөс харж байгаа гэж найдая. Түүний хувьд  нам доторхи бүлэг, фракцын шахаанд орж, тэдний хүслийг хангагч Засгийн газрыг байгуулах эрх  үгүй.  Тэгээд ч Монгол Улсын түүхэнд У.Хүрэлсүхийн Засгийн газар хэмээн тэмдэглэгдэн үлдэхээс бус тэр, тэр ийн орж ажилласан танхим гэхгүй нь ойлгомжтой. Нөгөөтэйгүүр, энэ Засгийн газарт ажиллах хугацаа бага, 2,5 жил л үлдэж буйг У.Хүрэлсүх төдийгүй МАН мартах учиргүй. Ямартай ч шинээр байгуулагдах Засгийн газрын танхимд багтах гэсэн хүн “морьд гараанаас гарцгаажээ. Зарим нь хийж бүтээсэн зүйл, нийгэмд таалагддаг байдлаараа өөрийгөө сойж байхад нөгөө нь ирлийз морьд шиг мөнгөтэй, нэр хүндтэй уяачдаар уяа сойлгоо таруулуулж, тэдний хэлсэн ярьснаар урагшилж явна. Барианы газар ч ойрхон хэдий ч  идэш ихтэй тарган морьд давааны уруу буухдаа хөл алддаг гэм бий.  Ингээд  Түргэний гол өөд өгсөн яваа бөөн адууг шинжие. Айдас толгой ороогоод ирэхийн цагт ч хэний хүлэг вэ гэдэг нь хэн хүнд танигддаг л юм.  Бараг л тодорхой  болоод байгаа мэдээллээр, Монгол Улсын Шадар сайдад дэслэгч генерал Жадамбаа агсны хүү  Энхбаярын нэр яригдаж байгаа аж.  Ерөнхий сайдын хэмжээнд яригдаж байсан  түүнийг  эл албан тушаалд очиход гайхах зүйл үгүй.   Улс төрийн болоод  хариуцлагатай алба хашиж явсан туршлага түүнд бий. Зарим эх сурвалж УИХ-ын гишүүн Ч.Улаан томилогдох байх гэцгээж байгаа ч   мань хүний хувьд  нам, үзэл бодлоосоо урваж, нааш цааш гүйсэн гэм нь  ард түмэнд таалагддагүй  юм.  Гадаад харилцааны сайдад  Н.Энхболд болоод УИХ-ын гишүүн Д.Цогтбаатарын нэр дуулдана лээ.  Энэ хоёр эрхмийн хэн хэн нь өмнө нь уг албан тушаалд ажиллаж байсан билээ.

Хэн   нь байж болох ч хувилбар.  Н.Энхболдын хувьд  олон улсад хүлээн зөвшөөрөгдсөн  улстөрч, ноён нуруутай дипломатч бол Д.Цогтбаатарын тухайд  БОАЖ-ын сайдаар  ажиллаж байсан мэргэшсэн дипломатч  юм.  Ерөнхий сайдад нэр нь яригдаж байгаад ямар учир шалтгаанаар нэрээ татаж авсан нь мэдэгдэхгүй байгаа  УИХ-ын дэд дарга Ц.Нямдорж энэ удаад хуульзүйн салбараа дахин тэргүүлэх сурагтай.   Парламентад  хамгийн олон жил сууж буй түүний амыг ард түмэн харж, ямар шийдвэр гаргахыг нь анхааралтайяа ажигладаг нь нууц биш.  Тэрбээр энэ удаад ч  намаа бодон  хамгийн хүнд шийдвэрийг гаргасан билээ.  Ижий болсон намынхаа  Засгийн газрыг  огцруулахад гарын үсэг зурсан  явдалд нь шан болгож уг албан тушаалыг хайрлаж байгаа болов уу. Мань хүн  авахгүй гэж ч мэднэ.  Сангийн сайдад бас л Ч.Улаан, Ч. Хүрэлбаатарын нэр явж буй.  Мэдээж Ч.Хүрэлбаатар нь дээр шүү дээ. У.Хүрэлсүх өөрөө эдийн засагч  мэргэжилтэй биш учраас  түүнд  хамгийн мундаг, алсыг харж тооцоолж чаддаг санхүүч л хэрэг болно.  Шулуухан хэлэхэд, Сангийн яам хэрхэн ажиллахаас Монгол Улсын эдийн засгийн төлөв байдал харагдах учиртай. Дээр нь өнөө олон зээлийн асуудал байна.  Эрчим хүчний сайдад УИХ-ын гишүүн Ц.Даваасүрэн бараг тодорхой болсон.  Шулуухан хэлэхэд, Засгийн газрыг огцруулах асуудлыг санаачилсан авторуудын нэг. Эдийн засагч мэргэжилтэй гэж л салбартаа гологддоггүй юм бол салбарын бодлогыг авч явах ухаан түүнд бий.  Мөн энэ  албан тушаалд эдүгээ дэд сайдаар ажиллаж буй  Гантулга ч бас яригдаж л байна лээ. Салбартаа танигдсан хүний хувьд болохгүй  гэх ч газар үгүй.  Нийгэм хамгааллын  яамыг УИХ-ын гишүүн  С.Чинзоригтой булаалцалдах хүн үгүй биз.  Нийгэм хамгааллын чиглэлээр түүний санаачилсан, өргөн барьсан хууль амьдрал дээр биеллээ олдог болохоор  ард түмэн түүнийг л томилогдоосой хэмээн хүсч байдаг юм. Дашрамд өгүүлэхэд, Нийгмийн хамгаалал, хөдөлмөрийн яам үйл ажиллагааныхаа чиглэлээр салж буй. Хөдөлмөрийн яам дээр  УИХ-ын гишүүн  Д.Сарангэрэл очих сураг дуулдсан.   Идэвхтэй гишүүний хувьд яагаад болохгүй гэж. Тэгээд ч энэ танхимыг  чинь хоёрын зэрэг бүсгүйчүүд чимж байхгүй бол тэнэг харагдана биз дээ.   Эрүүл мэндийн яамны хувьд гаднаас тодруулбал, салбартаа хүлээн зөвшөөрөгдсөн хүн хэрэгтэй болов уу. Энэ яамны  нэр хүнд шороотой хутгалдах дээрээ тулаад байгаа. Салбарынхны яриагаар бол үе үеийн сайд нараас хамгийн нэр хүндтэй, салбартаа дэм болж чадсан хүн бол сайд асан С.Ламбаа гуайг гэцгээдэг юм билээ.  Тиймээс түүнтэй зэрэгцэх л эрхмийн эрэлд л  мордох болж дээ. Боловсрол соёл, шинжлэх ухаан, спортын яам дээр хэд хэдэн хүний нэр яригдаж байгаа. Яам нь хоёр хуваагдана. Боловсрол, шинжлэх ухааны яамыг  Н.Учралд өгөх бол Соёл,спорт дээр мөн л гаднаас тавих сураг байна лээ.  Ямартай ч  спортыг Шаравжамц гэх хүний гараас салгах хүн энэ яаманд хэрэгтэй хэмээн спортынхон бурханд залбирч байгааг эрхэм шинэ Ерөнхий сайдын сонорт дуулгах байна. Монгол Улсын Ерөнхийлөгч ч тийм чиг үүргийг өгсөн гэж дуулдсан.  БОАЖ-ын яамны сайдад таарах хүн нь магадгүй Я.Содбаатар байж мэднэ. Одоогоор түүнд өрсөлдөгч гарч ирээгүй байгаа. Батлан хамгаалахын сайдаад дэслэгч генерал Ц. Тогоо болох нь тодорхой. Нэр хүнд нь навс унасан,  АТГ-ын ажлаар дарж байдаг энэ яамыг мэргэжлийн хүний гарт атгуулах цаг болсон.  Зэвсэгт хүчнийг жинхэнэ утгаар нь хөдөлгөж байсан түүнд салбараа авч явах мэдлэг, ухаан, ажлын туршлага бий гэдэгтэй хэн ч маргахгүй.  Уул уурхай яам гэж нойроо дийлэхээ больсон яамыг   уурхайчин гишүүд булаалдаж байгаа.  Хэнийг нь сонгохоо У. Хүрэлсүхийн ухаан л мэдэх хэрэг.  Алт-2 хөтөлбөр, Гацууртын орд гээд Монгол Улсын эдийн засагт нэмэр болох  төслүүдийг хөдөлгөхгүй бол зээлийнхээ ард гарахад хэцүүг шинээр байгуулагдах Засгийн газар  тооцоолох биз. Барилга, хот байгуулалтын яам дээр   нэр дуулдахгүй байгаа. Сураг сонсох нь ээ, өмнөх Засгийн газраас ганцхан Г.Мөнхбаяр үлдэх вм гэнэ лээ.  Салбараа гарын таван хуруу шигээ мэддэг хүний хувьд түүнээс салгах гэж зүтгээд ч яах билээ. Орон сууцтай холбоотой асуудал ард  түмний эрэлт хэрэгцээг хангах байдлаар шийдэгдэж л байвал  болох нь тэр. Намдаа ч хэрэгтэй биз. Хөдөө, аж ахуй, хөнгөн үйлдвэрийн яаман дээр олон хүн нэрээ дэвшүүлэх гээд У.Хүрэлсүхийн хаалган дээр дугаарлаж суугаа учраас хэнийг нь гэх билээ. Ямартай ч энэ яам мөн л хоёр салж шинээр Аж үйлдвэрийн яам гэж байгуулагдах юм гэнэ лээ. Саарал ордонд явж байгаа мэдээллээр иймэрхүү өнгө төрх, бүтэц бүрэлдэхүүн  бүхий танхим үүднээ хаалгаа нээх гэж байна.  

 Улс орны өмнө тулгамдсан асуудлыг шийдвэрлэх гарц хайж, МАН-ын сонгуулийн мөрийн хөтөлбөрийг хэрэгжүүлэхээ   Монгол Улсын 30 дахь Ерөнхий сайд У.Хүрэлсүх Бага хурлын гишүүдэд танилцуулсан юм билээ. МАН-ын Удирдах зөвлөл ч шинэ Засгийн газрыг тогтвортой ажиллуулна, гэхдээ хариуцлага алдвал тооцоо хийнэ гэдгийг нэр дэвшигчид сануулсан.

Ерөнхий сайдад нэр дэвшигч У.Хүрэлсүхэд танхимаа мэргэшсэн, туршлагатай эрхмүүдээр бүрдүүлэхийг бага хурлын гишүүд ч  сануулсан, басхүү нийгмийн захиалга байгаа.

Ч.Чулуун

ЭХ СУРВАЛЖ: http://mminfo.mn