У.Хүрэлсүхийн Засгийн газрын тоолуур маргаашнаас гүйж эхэлнэ. Давхар дээлийг хална гэсэн МАН-ын мөрийн хөтөлбөрийн эсрэг ажиллаж, 100 хувь парламентаас бүрдсэн, ашиг сонирхлын зөрчилтэй зэргээр сөрөг хүчин болоод төрийн тэргүүнээс банга хүртсэн ч Ерөнхий сайд үг дуугүй зүтгүүлж, сайд нарынхаа нэрийг өргөн барилаа. Байнгын хороод ч яаравчлан хэлэлцэж, нэр дэвшигчдийг ногоон гэрлээр явуулж байна.
У.Хүрэлсүхийн сайд нараас хамгийн их эсэргүүцэлтэй тулгарсан нь УИХ-ын гишүүн Ч.Хүрэлбаатар. Сангийн сайдад горилж буй эрхмийг ах дүүгээрээ нийлж, төрийн мөнгө идсэн хэмээн хэсэг цоллов. Араас нь Ерөнхийлөгч бас АН-ынхан Ч.Хүрэлбаатарыг дэмжихгүй гэж гүрийв. Харин Төсвийн байнгын хорооныхон түүнийг Сангийн сайдад 100 хувь дэмжиж, баярын мишээлийг нь тодруулав. Эсэргүүцэлтэй тулгарсан ч сайд болох зам нь нэгэнт нээгдсэнд тэр чамгүй баяртай байгаа бололтой, ихэд сэтгэл хангалуун харагдана лээ.
В.Бат