Ерөнхийлөгч Х.Баттулга цаазын ялын сэргээн хэрэглэх санал гаргаж, Хуульзүй, дотоод хэргийн сайд Ц.Нямдоржид хандаад буй. Бага насны хүүхдийг хүчирхийлсэн, амийг нь хөнөөсөн, тарчлаан зовоосон, балмад хэрцгий аллагын гэмт этгээдүүдэд цаазын ял оноох нь зүйтэй хэмээн төрийн тэргүүн үзэж буй юм.

Ерөнхийлөгчийн энэ саналд олон нийт хуваагдаад буй. Нэг хэсэг нь цаазын ялыг сэргээх нь зөв хэмээн үзэж буй бол нөгөө хэсэг нь гэмгүй хүн амь үрэгдэх эрсдэлтэй учраас шаардлагагүй хэмээн тайлбарлаж байгаа юм.

Эл асуудлаар УИХ-ын гишүүн О.Баасанхүү байр сууриа илэрхийллээ. Тэрбээр цаазын ялыг сэргээх Ерөнхийлөгчийн саналыг дэмжиж буй аж. О.Баасанхүү цааш нь “Цаазаар авах ялыг хавтгайруулсан оноох нь буруу. Мөн цаазаар авах ялын гүйцэтгэлийг тодорхой хугацаанд 5, 10 жилээр хойшлуулж, тухайн хүний хүмүүжлийн байдлаас хамаарч, ялыг нь өөрчилж болно. Насанд хүрээгүй хүүхдийг хүчиндэж, амь насыг нь хөнөөсөн тохиолдолд цаазаар авах ялыг хэрэглэх хэрэгтэй.

Үндсэн хуулинд хуулиар хориглосноос бусад тохиолдолд хүний амь насыг бүрэлгэхийг хориглосон. Энэ нь цаазаар авах ял байж болохыг хэлж байгаа юм” гэсэн тайлбарыг өглөө. 

Б.Энэрэл