УИХ-ын чуулганы нэгдсэн хуралдаанаар Ерөнхийлөгчийн хоригийг хэлэлцэв. Ерөнхийлөгч 2018 оны улсын төсөвт хориг тавьсан билээ.  Хэлэлцэж байгаа асуудалтай холбогдуулан гишүүд асуулт тавьж, үг хэлэв. Тухайлбал,  УИХ-ын гишүүн Л.Болд “ОУВС-гийн хөтөлбөрийн хүрээнд төсвийг баталсан гэх ч цалин, тэтгэврийг тодорхой нэмсэн. Харин хүүхдийн мөнгийг зорилтот 60 хувьд нь өгөхөөр болсон. Хүүхдүүдийг ялгаварлаж байна. Тиймээс би энэ хоригийг хүлээж аваасай гэж хүсч байгаа юм” хэмээсэн бол УИХ-ын гишүүн Ц.Мөнх-Оргил:

-Ерөнхийлөгчийн хоригийг энэ удаад хүлээж авах боломжгүй юм. Мэдээж, цэвэр өөгүй төсөв биш. Алдаатай зүйл байгаа байх. Бид эдийн засгаа дампуурлын ирмэгт авчирсан. Үүнийг эмчлэхийн тулд бид УИХ, Засгийн газартайгаа ярьж байгаад олон улсын хамтын нийгэмлэгтэй хамтарч ажиллаж байна. Тиймээс ОУВС-г буруутгах шаардлага байхгүй. Харин ч тэдэнд баярлаж, эдийн засгаа эрүүлжүүлэх хэрэгтэй. Энэ нь ОУВС-гаас гадна бидэнд хэрэгтэй. Үүнийг УИХ-ын гишүүд тэр дундаа Засгийн газрын гишүүд ойлгуулж байх хэрэгтэй гэсэн юм.

Ингээд 2018 оны улсын төсөвт тавьсан Ерөнхийлөгчийн хоригийг хүлээн зөвшөөрөх боломжгүй гэсэн байнгын хороодын дүгнэлтээр санал хураалт явууллаа.  Чуулганы хуралдаанд оролцсон гишүүдийн 82.4 хувийн саналаар дэмжлээ.

Тиймээс Ерөнхийлөгчийн хоригийг хүлээж аваагүй учир Монгол Улсын 2018 оны төсвийн зургадугаар зүйл хүчин төгөлдөр үлдэж байна. 

Үүний дараагаар Төрийн албаны тухай хуульд нэмэлт өөрчлөлт оруулах тухай хуулийн төслийн эцсийн хэлэлцүүлгийг хийж эхэллээ.

Н.Энх