Нийслэлийн Засаг дарга С.Батболд “Улаанбаатар төмөр зам” ХНН-ийн дарга Д.Жигжиднямаад албан бичиг хүргүүлж, Баянгол дүүрэг, Төмөр замын хажууд байрлах 1000 машины авто захыг нүүлгэх ажилд дэмжлэг хүссэн билээ. Гэвч уг ажил авто худалдаачдын эсэргүүцэлтэй тулгарч, өнөөдөр үймээн дэгдлээ. Газар чөлөөлөх асуудлаар очсон албаныхан авто худалдаачдын эсэргүүцэлтэй тулгарч, цагдаагийн хамгаалалт авсан байна. Цагдаа нар зарим худалдаачдыг баривчилсан гэх мэдээлэл байна.
Авто худалдаа явагдаж буй тус газрыг нийслэлийн Засаг даргын 2017 оны 10-р сарын 20-ны өдрийн А/813 захирамжаар Баянгол дүүргийн 4-р хорооны нутаг дэвсгэрт төмөр замын буудал барих зориулалтаар Улаанбаатар төмөр зам ХНН-т олгожээ. Тиймээс зориулалтын дагуу ашиглах үүднээс авто худалдааг нүүлгэж, газрыг чөлөөлөх шаардлага тавьсан ч авто худалдаачид хүлээж авсангүй.
Нийслэлийн авто замын түгжрэл, агаар, хөрсний бохирдлыг бууруулах зорилгоор Сонгинохайрхан дүүргийн 32 дугаар хорооны нутаг дэвсгэрт авто худалдааны цогцолборыг байгуулаад буй. Тус цогцолбор руу хотын төвд байрлаж буй авто худалдааны захуудыг нүүлгэх ажил эхэлсэн ч гацаанд ороод буй. Авто худалдаачид хотоос нүүхгүй гэдгээ удаа дараа мэдэгдэж, эсэргүүцлээ илэрхийлсээр буй юм.
Б.Энэрэл