УИХ-ын даргын захирамжаар байгуулагдсан “УИХ болон байнгын хороо, дэд хорооноос агаарын бохирдлыг бууруулах чиглэлээр өгсөн тогтоол, шийдвэрүүдийн хэрэгжилтийг дүгнэх шаардлагатай тохиолдолд хууль, УИХ-ын бусад шийдвэрийн төсөл боловсруулж, санал, дүгнэлт гарган Засгийн газарт чиглэл өгөх үүрэг бүхий” ажлын хэсгийн хуралдаан Төрийн ордонд хуралдаж байна. Хуралдаанд холбогдох яамдын удирдлагууд оролцож байгаа юм.

Өнгөрсөн онд 23 мянган гэр хорооллын айл өрхийг цахилгаан халаагуурт холбож дууссан байна. Энэ онд  Дарь-Эхийн, Дамбадаржаагийн, Хайлаастын гэр хорооллыг цахилгаан халаагуурт холбох аж. Хэлэлцэж байгаа асуудалтай холбогдуулан гишүүд асуулт тавьж, хариулт авч байна.

УИХ-ын гишүүн Д.Хаянхярваа:

-Гэрийн дулаалгыг хэрхэн шийдэх вэ? Дулаан хадгалах чадвартай дулаалгад хэдий хэмжээний хөрөнгө шаардлагатай байна. Гэр хорооллын цахилгааны шугам сүлжээний хүчин чадал хангалттай юу? Одоо Засгийн газар зоригтой шийдэл гаргах хэрэгтэй. Гадаадын орнууд бага зардалтай орон сууцаар хангаж ирсэн. Ойрын үед маш тодорхой шийдвэрийг Засгийн газар УИХ-д оруулж ирэх хэрэгтэй байна.

ШУА-ийн Ерөнхийлөгч Рэгдэл:

-Нэгдсэн тооцоо хийгдээгүй. Таван ханатай гэрийг сайн дулаалвал хоёр кВт эрчим хүчээр дулаан хадгална. Гэрийн дулаалгын материалыг хийхэд 1.3 сая төгрөг болно. Дэд бүтцийн ТЭЗҮ-ийг боловсруулж байна. 50 айлыг багтаасан халаалтын зуух 100 сая төгрөгт багтаж байгаа. Дулаалгын материалыг гадаадаас судалж үзмээр байгаа юм. Гэрийн дулаалга үйлдвэрлэдэг үйлдвэр байгуулах нь зүйтэй юм гэлээ.

УИХ-ын гишүүн Ж.Ганбаатар:

-Утааны асуудал ярихаар буруутан байхгүй болчихоод байгаа юм. Засгийн газар, ЭХЯ, Улаанбаатар хотод буруу байхгүй, өмнө замаа харахаа больтол утаатай болчихсон байна. Бодитой зүйл ярих хэрэгтэй. Оронсууцжуулах асуудлаар 2-3 давхар байр барина гэдэгт санал нэг байна.

УИХ-ын гишүүн Д.Эрдэнэбат:

-Утааны асуудлаар одоо шийдэл гаргах хэрэгтэй. Хуульгүйгээр, төрийн шийдгүйгээр утаа арилахгүй. Тиймээс хууль санаачил. “Яндангаасаа хар утаа гаргаж байгаа этгээд гэмт хэрэгтэн мөн” гэж Лондонгийн хуульд бичсэн байдаг. Тэгэхээр тухайн айл өрх, хувь хүн хар утаа гаргахгүй байхаар зүтгэнэ. Үүнээс юунд нь айх вэ.  Хар утаа гаргавал айл бүр 50 мянга, аж ахуйн нэгж байгууллага 500 мянган төгрөг торгох хэрэгтэй.  Тэр хүн цахилгаанаа сонгоно уу, дулаан халаалт тавих уу гэдгийг өөрсдөө шийдэх хэрэг. Шийдвэртэй арга хэмжээ авах хэрэгтэй байна. Баянзүрхэд ирэх жил дэд бүтэц татах ажлыг хэрэгжүүлэх хэрэгтэй.

Ийнхүү ажлын хэсгийн хуралдаан удирдамж гаргахаар боллоо. Уг удирдамжид нэгдүгээр сарын 04-12-ныг хүртэл ажлын хэсгийн гишүүд  дүүргүүдэд ажиллах юм байна.

Н.Энх