БХБ-ын сайд Х.Баделханаас цаг үеийн асуудлаар зарим зүйлийг тодрууллаа.
-Утааг бууруулах асуудлаар УИХ хууль, тогтоолын төсөл батлаад байна. Ажлын хэсгийн төвшинд энэ асуудлаар ямар санал бэлтгэж байгаа бол?
-Агаарын бохирдлыг бууруулахын тулд одоо бэлэн байгаа 30 орчим мянган айлын орон сууцыг иргэдэд олгох хэрэгтэй гэж ярьж байгаа. Иргэд одоогоор худалдан авах чадваргүй байна. Барилгын компаниуд өндөр зээл аваад барилгаа барьчихсан байгаа. Тийм учраас хоёр талд хүндрэлтэй асуудал байгаа. Үүнээс гарахын тулд тодорхой саналыг Засгийн газарт оруулах гэж байна. Засгийн газраас шийдвэр гарсны дараа бид албан ёсоор зарлана.
-Ямар санал бэлтгэгдэж байгаа бол?
-Өнөөдрийн хямралтай үед тухайн аж ахуйн нэгж, арилжааны банкууд төр гурван талдаа тохироод 1-2 жилийн хугацаанд зарим иргэдийг орон сууцанд оруулаад, төлбөр тооцоог нь дараа нь хийх зохицуулалт ярьж байгаа. Өнөөдрийн тухайд банк шууд 30 хувиа төлөөд ор гэж байгаа. Урьдчилгаа төлж чадахгүй хүмүүс их байна. Нөгөө талд барилгын компаниуд зээл аваад барилга барьчихсан байна. Өнөөдөр манайх ОУВС-гийн өргөтгөсөн хөтөлбөртэй холбоотойгоор Монгол Улсын төсвийн бүх орлого зарлагаа зохицуулж байгаа. Тиймээс бид хоёр жилийн хугацаандаа тэсч, компаниуд буулт хийж, банкны байгууллага ч гэсэн зохих хэмжээнд хөнгөлөлт үзүүлж, төрөөс зохих хэмжээний дэмжлэг үзүүлж, иргэдээ орон сууцжуулах боломж байна уу гэдийг судалж байгаа. Зээлийн хүүг зохих хэмжээнд бууруулж хөдөө аймаг, нийслэлийн захын хорооллыг хамруулахаар ярьж байгаа.
-Энэ жил хэмжээний хөрөнгө оруулалт хийгдэх вэ?
-Улаанбаатар хотын гэр хорооллын дахин төлөвлөлт, Хятадын буцалтгүй тусламжийн хүрээнд 1800 гаруй айлын орон сууцны барилгын ажил эхэлж байна. Төв цэвэрлэх байгууламжийг ажлыг гүйцэтгэхээр Хятадын Эксим банктай яриа хэлэлцээр хийж байгаа.
Түрээсийн орон сууцны талаар БХЯ өөрсдийн бодлогоо боловсруулаад Засгийн газарт оруулахаар бэлтгэж байна. Мөн Ипотекийн зээлийн хүүг бууруулах асуудлаар Сангийн сайдын тушаалаар ажлын хэсэг гарч ажиллаж байгаа. Цаашдаа орон сууцны зээлийн хүүг тодорхой хэмжээгээр бууруулах, урьдчилгаа төлбөрийг бууруулах чиглэлээр тодорхой ажил төлөвлөн ажиллаж байна.
-Гэр хорооллыг дэд бүтэцжүүлэх асуудлыг нийслэлийн удирдлагууд ярьж байсан. Энэ хэр хүртээмжтэй арга хэмжээ бол?
-Гэр хорооллыг дэд бүтэцжүүлэх ажил энэ оноос эхлээд хэрэгжинэ. Боломжтой. Үүнд 200-250 айл өрх дундаа инженерийн шугам сүлжээ байгуулаад, нэгдсэн халаалт, дулааныг өгнө. Бичил дэд бүтэц гэсэн төсөл энэ оноос эхлээд хэрэгжээд явна
-Концессийн гэрээ үргэлжлэх үү?
-Концесс цаашдаа үргэлжлэхгүй.
-Барилга угсралтын тусгай зөвшөөрлийг цахимаар олгодог боллоо. Ингэснээр хэдий хугацаанд зөвшөөрөл олгогдох бол. Өмнөхөөсөө хугацаа нь богиносох уу?
-Тусгай зөвшөөрлийг гурван жилийн хугацаанд олгож байгаа. Ер нь урьд нь бичгээр бүх материалыг бүрдүүлдэг байсан. Ингэхдээ маш их хэмжээний материал бүрдүүлнэ. Бүрдүүлсэн материалыг нь тулгаж, шалгаж шийдвэр гаргана. Харин одоо цахимаар хүлээн авдаг болсноор тухайн өөрийн иргэний үнэмлэхээ хийхэд цахимаар бүх зүйл гараад ирнэ. Урьд өмнө инженер техникийн ажилтнуудын давхцал маш их байдаг байсан. Одоо давхцал арилна. Үйлчилгээ хурдан, шударга явагдана.
Н.Энх