Сүүлийн 4, 5 жилийн хугацаанд Монголын сагсан бөмбөгийн ертөнц хэд хэд хуваагдахыг үзлээ. Монголын сагсан бөмбөгийн холбоо гэж нэг холбоо байсан бол одоо тамирчдыг татаж чангааж буй гурван холбоотой болчихоод байгаа юм. Хэн нь хэн бэ гэдгээ шийдэж чадахгүй байгаагаас болж Олон Улсын Сагсан бөмбөгийн Холбооноос Монголын шигшээ багийг тодорхойгүй хугацаагаар олон улсын чанартай тэмцээнд оруулахгүй гэсэн захирамж гаргаад удаж байна.

Тэгвэл өнөөдөр энэ гурван холбооны хамгийн сүүлд олон нийтэд үзэгдэж эхэлсэн холбоо болох Ц.Цэвэрбал удирдалагтай хоёр дахь МСБХ өнөөдөр өөрсдийн байр суурийг илэрхийлж хэвлэлийн бага хурал хийлээ. Уг холбоо нь 2016 онд бүх нийтийн нэртэй хурал зохион байгуулж, Ц.Цэвэрбалыг тэргүүнээрээ сонгосон юм.

Хэвлэлийн бага хурлын эхэнд Ц.Цэвэрбал нь өнөөгийн ойлгоход хэцүү нөхцөл байдлыг нөгөө нэг МСБХ-ы тэргүүн Б.Тамиртай холбож яриагаа эхэлсэн юм. Түүний хэлснээр 2014 оны 3 сарын 28-нд гарсан шүүхийн тогтоолоор Б.Тамирын удирдаж буй МСБХ нь хууль бус гэдэг нь тогтоогдсон гэв. Үргэлжлүүлэн олон нийтэд үүсээд байгаа үл ойлгох нөхцөл байдал нь Б.Тамиртай холбоотой бөгөөд хууль бус гэдэг нь тогтоогдчихоод байхад хуучин тамга тэмдэг ашиглаж, үйл ажиллагаа явуулж байгаа юм гэлээ. Мөн түүний ямар үйл ажиллагаа явуулж буйг мэдэхгүй гэлээ.

Мөн саяхан болсон дээд шүүхийн шийдвэрээр улсын бүртгэлээс хассан гэж үргэлжлүүлэв. Ингээд Олон Улсын Сагсан бөмбөгийн холбоонд бүртгэлтэй МСБХ-ны ерөнхийлөгч нь хэн бэ гэдгийг дээд шүүх тогтоогоод өгсөн хэмээв.

Тэгвэл албан ёсны гэж өөрийгөө зарлаад байгаа хоёр дахь МСБХ нь өнгөрсөн хугацаанд яг ямар үйл ажиллагаа явуулж байсан юм бол гэсэн асуулт төрнө. Харин уг асуултанд МСБХ-ны тэргүүн Ц.Цэвэрбал нь Б.Тамир гэж хүн ажил хийлгэхгүй байна гэж хариулсан юм.

Улмаар уг асуудлыг шийдэж Монголын сагсан бөмбөгийг авраач гэсэн уриаг ерөнхий сайд У.Хүрэлсүх, спортын сайд Ц.Цогзолмаа, БСТГ-ын дарга МУГТ Ц.Шаравжамц нарт хүргэхийг зорьж байгаа гэдэг нь хулдааасан хэвлэлээс нь харагдаж байлаа.

Б.Энх-Амгалан