Засгийн газраас 2018 оныг сахилга хариуцлагын жил болгон зарласан. Үүнтэй холбогдуулан АТГ-ын тэргүүн комиссар Х.Энхжаргал өнөөдөр /2018.03.02/ Засгийн газрын хэрэг эрхлэх газрын дарга Г.Занданшатар болон 13 яамны Төрийн нарийн бичгийн дарга нарт АТГ-ын ажлын удирдамжийг гардууллаа.
Авлигатай тэмцэх үндэсний хөтөлбөрийн хүрээнд АТГ-ын ажлын хэсэг төрийн бүхий л шатны байгууллагад ажиллан авлигын эсрэг хууль тогтоомжийн хэрэгжилттэй танилцжээ. Улмаар АТГ-аас шалгалтын үр дүнг Үндэсний Аудитын газар , Төрийн албаны зөвлөлтэй хамтран хэлэлцүүлсэн бөгөөд шалгалтын үед илэрсэн зөрчил дутагдлыг арилгуулах , цаашид дахин зөрчил гаргахгүй байх үүднээс зөвлөмж боловсруулан Засгийн газрын хэрэг эрхлэх газарт хүргүүлсэн байна.
АТГ-ын ажлын хэсгүүд энэ оны гуравдугаар сараас дахин төрийн байгууллагуудад ажиллаж, хүргүүлсэн зөвлөмжийн хэрэгжилттэй танилцах аж. Энэхүү шалгалтын удирдамжийг АТГ-ын дарга тэргүүн, комиссар Х.Энхжаргал өнөөдөр /2018.03.02/ Төрийн нарийн бичгийн дарга нарт гардуулан, танилцууллаа.
Засгийн газрын хэрэг эрхлэх газрын дарга Г.Занданшатар “Энэ онд Төрийн албаны бүх шатанд сахилга хариуцлагыг дээшлүүлэх үүрэг даалгавар өгсөн. Үүний хүрээнд өнөөдрийн арга хэмжээ явагдаж байна. Гааль татварын газарт авлигын индекс өндөр байна гэж олон улсын байгууллагаас дүгнэсэн. Иймд лиценз, тусгай зөвшөөрлийг цахим болгохоор Засгийн газрын бодлогын зөвлөл ажиллаж байна. Энэ онд багтаан иргэд гар утсаараа санал бодлоо хуваалцаж асуудлаа шийдүүлдэг болох ажлыг Засгийн газраас эхлүүлсэн. Засгийн газрын хэрэг эрхлэх газраас ёс зүйн дүрмийг УИХ-аар батлуулж, төрийн албаны бүх шатанд мөрдүүлэх ажлын хэсэг байгуулан Төрийн албыг илүү хариуцлагатай, шударга ёсыг дээдэлсэн болгохоор ажиллаж байна” гэв.
Г.Тэгшсүрэн
Уншиж байна |