Монголын үндэсний бөхийн холбооны ээлжит болон ээлжит бус “Их Эе” хурал болох тухай зар тархаж, болно, болохгүй гэх няцаалт, мэдээлэл хоёрын дунд иргэд, олон нийт төөрөгдсөөр даруй хоёр жилийг үджээ.

Монголын үндэсний бөхийн холбооны цэцдийн зөвлөлөөс ээлжит бус  “Их эе” хурлыг 2016 оны арванхоёрдугаар сарын 10-нд хуралдуулах тухай тов зарласан. Гэсэн ч МҮБХ-ны тэргүүн Р.Нямдорж хуралдах хууль зүйн үндэслэлгүй талаар мэдээлэл хийж, болиулсан.

Дараа нь 2017 оны тавдугаар сарын 28-нд цэцдийн зөвлөлөөс ээлжит бус “Их Эе”-ийг хуралдуулахаар  болсон. Арай гэж өнөөх сүржин нэртэй даржин хурал нь болж МҮБХ-ны тэргүүнээр “Гачуурт” ХХК-ийн ерөнхий захирал Л.Чинбатыг томилсон тухайгаа олон нийтэд мэдээлж, МҮБХ-ны цэцдийн зөвлөлийн гишүүн, “Их эе” хурлын зохион байгуулах ажлын хэсгийн ахлагч Ү.Хүрэлбаатар “Р.Нямдорж 26 жил бөхийн холбоог удирдлаа. Одоо биднийг хадаг, сүү бариад угтах байх гэж найдаж байна” хэмээж байсан. Гэсэн ч Р.Нямдорж нь ажлаа өгөхгүй “гэдийж” “Ажлаа өгнө. Гэхдээ би А.Сүхбат нарын нөхдүүдэд өгөхгүй” хэмээж нээрэн өгөлгүй өдийг хүрсэн. Цэцдийн зөвлөлөөс бөхийн өргөөний гадна талбайд жагсаал хүртэл хийгээд тусыг эс олсон.

Дотооддоо асуудлаа нэг тийш болгож, албан ёсоор тамга тэмдгээ авалцах өгөлцөөгүй атал МҮБХ-ны ерөнхийлөгчийг сольсон, сонгосон гэж яаран сандран олон нийтийн мэдээллийн хэрэгслээр зарласан нь иргэдийг өнөөдрийг хүртэл төөрөгдөлд оруулж байна. Сүүлдээ “Их эе” гэх үгийг сонсохоос “үстэй толгой” арзайх хүртлээ залхсан гэж хэлэхэд хэлсдэхгүй.

МҮБХ-ны тэргүүн Р.Нямдорж эрх мэдлийнхээ хүрээнд ээлжит “Их эе” хурлыг энэ сарын 24-нд зохион байгуулахаар тов зарлав. Энэ хурал нь болж, МҮБХ-ны шинэ ерөнхийлөгч сонгогдлоо гэхэд өнөөх ээлжит бус хурал хийж “дөвчигнөсөн” нөхдүүд эргээгээд “Наад хурал чинь хууль бус. Наад ерөнхийлөгч чинь ч шударга биш” гээд дахиад “Их эе” хуралдуулна гэж няцаавал яана аа.

Авах гэж, үлдэх гэж тэмцсэн хүмүүсийн худал, үнэн мэдэгдэл дунд иргэд төөрч, будилсаар л байх уу???

Г.Тэгшсүрэн