Ерөнхийлөгч Х.Баттулга өчигдөр зарлиг гаргаж, гурван генералын цолыг хураалаа. Гэмт хэрэг үйлдсэн нь шүүхээр тогтоогдож, хорих ял шийтгүүлсэн Чимэддоржийн Амарболд, Пүрэвийн Даш нарт хүртээсэн “Хошууч генерал” цол, Тожооны Дашдэлэгт хүртээсэн “Бригадын генерал” цолыг хураах шийдвэрийг төрийн тэргүүн гаргалаа. Үүнээс өмнө Х. Жекейд олгосон “Бригадын генерал” цолыг хураасан. Үүний шалтгаан нь Х.Жекей Монгол Улсын харьяатаас гарсан учраас цолыг нь хурааж авсан юм. Ингэснээр дөрвөн хүн алтан мөрдэсгүй боллоо.
Тэднээс олон нийтийн дунд хамгийн их яригдаж буй нь Ч.Амарболд. Цагдаагийн хэсгийн төлөөлөгчөөс эхлээд ЦЕГ-ын дарга хүртэл ажилласан “ЖИНХЭНЭ ЦАГДАА ХҮН”-ийг төр хэлмэгдүүллээ гэх коммент хөвөрч байна.
Цол хураах тухай Ерөнхийлөгчийн зарлигт “Гэмт хэрэг үйлдсэн нь шүүхээр тогтоогдож, хорих ял шийтгүүлсэн” гэх тайлбар бий. Ч.Амарболдод хамааралтай тэр гэмт хэрэг нь түүхийн хуудсанд хараар тэмдэглэгдсэн “Долоодугаар сарын 1-ний үймээн”. Таван хүнийг амь насаа алдахад хүргэсэн энэ үймээний буруутнаар Ч.Амарболд тодорч, шүүхээс ял сонссон. ЦЕГ-ын даргын үүрэг гүйцэтгэгчээр ажиллаж байсан түүнийг Эрүүгийн хуулийн 294.2-т зааснаар “Захирагч эрх мэдэл, албан тушаалынхаа байдлыг урвуулан, албаны бүрэн эрхээ хэрэгжүүлээгүйгээс төрд онц их хэмжээний хохирол учруулсан” хэрэгт буруутган, 6.6 жилийн ял сонсгосон.
Харин хуулийн салбарынхан түүнийг гэмт хэрэг хийсэн бус хэлмэгдсэн хэмээн үздэг. Тухайлбал, хуульч О.Алтангэрэл
2008.07.01-ний өдрийн үйл явдлын хар сүүдэр олон хүнд туссаны нэг нь Ч.Амарболд генерал. Түүнийг ЦЕГ-ын даргын үүрэг гүйцэтгэгч байсан гэж (үнэндээ байгаагүй гэдэг нь шүүхийн шийдвэр болоод бусад баримтаар тогтоогддог юм) цэргийн гэмт хэргээр (тэр нь ямар ч хамаагүй зүйл анги) өөр 3 нөхрийнх нь хамт яллаж, шоронд суулгасан.
Тухайн үед хэрэгт биечлэн оролцож явсны хувьд, олон үйл баримтаар дамжин мэдэгддэг байсан тул заавал ял өгч шоронд суулгах даалгаврыг ерөнхийлөгч асан Ц.Элбэгдорж өгч байсанд би хувьдаа эргэлздэггүй. Тэрхүү даалгавар энэ эрхэм хүнийг нэг удаа шоронд суулгаж хохироосон бол хор хохирол нь өнөөг хүртэл үргэлжилж цолыг нь хураахад хүргэлээ.
Гэхдээ хууль ёсны хувьд түүнийг болон нөхдийг нь ялласан хэргийн үнэн мөн нь тодорч цагаадахын цагт Монгол төр уучлал гуйн, цолыг нь сэргээх цаг удахгүй ирнэ гэдэгт үл эргэлзэнэ! хэмээн өмгөөллөө.
Мөн түүнийг улс төрийн золиос болж, хэлмэгдсэн гэх коммент нийгмийн сүлжээнд цөөнгүй харагдана.
Тэгэхээр шүүх байгууллагаасаа эхлээд төрийн тэргүүн хүртлээ Монголын төр Ч.Амарболд гэх хүнийг хэлмэгдүүлчихэв үү. Эсвэл тэр зохих ёсны шийтгэлээ эдэлж, төрийн төмөр нүүрийг үзэж байна уу.
Б.Учрал