“Дүнжингарав-2018” хаврын бүсийн уралдааны соёолон насны морьдыг харуй бүрийд уралдааны замд гаргаж, шөнийн цагаар унаач хүүхдүүдийн эрүүл мэнд, амь насыг эрсдэлд оруулсан хүмүүс эхнээсээ хариуцлагаа хүлээж байна. Түүхэндээ анх удаа шөнөөр уралдаан зохион байгуулсандаа Монголын морин спорт, уяачдын холбооны тэргүүн М.Энхболд өөрийн хүслээр суудлаасаа буусан.

Гэвч Засгийн газрын тогтоол шийдвэргүйгээр “Дүнжингарав-2018” уралдааныг зохион байгуулж, 16 хүүхдийг бэртэж гэмтэхэд хүргэсэн хариуцлагыг бэлгэ тэмдэг болсон дарга суудлаасаа буусан төдийхнөөр өнгөрөөж болохгүй. Тиймээс Ерөнхийлөгч зарлиг гарган, тус уралдааныг гардан зохион байгуулсан хүмүүсийн цол тэмдгийг хураахаар болжээ. Энэ тухай Ерөнхийлөгчийн Тамгын газрын дарга З.Энхболд хэвлэлд өгсөн ярилцлагадаа дурдсан байна. Тэрбээр “Саяхан Дүнжингарав уралдааныг Засгийн газрын тогтоолгүйгээр, хууль зөрчиж харанхуй шөнө зохион байгуулсан уяачдын холбооны удирдлагуудын цолыг хураах гэж байна. Дүнжингарав уралдааныг зохион байгуулахыг зөвшөөрсөн Уяачдын холбооны тэргүүн дэд Ерөнхийлөгч Д.Дагвадорж болон нарийн бичгийн дарга П.Сэргэлэн нарын тод манлай, алдарт уяач цолыг нь хураах зарлиг энэ долоо хоногт гарна” хэмээн ярьжээ. Дараа дараагийн удирдлага, уралдаан зохион байгуулагчдад сургамж болгох үүднээс ийм шийдвэр гаргаж буй аж.

Ямар ч хариуцлага хүлээхэд бэлэн хэмээн мэдэгдээд байсан уяачдын холбооны удирдлагуудад энэ гэнэтийн мэдээ биш биз. Тэд Засгийн газрын шийдвэргүйгээр том толгойлсон. Тэгээд зогсохгүй шөнийн цагаар морь уралдуулж, олон хүүхдийг морь, машинд дайруулах эрсдэлд оруулсан учраас хариуцлага хүлээх нь зүй ёсны асуудал. Харин ч хариуцлага хөнгөн байна.

Монголын улс төр, бизнесийн салбар алдарт уяачдаар дүүрэн. Мөнгөтэй бүхэн нь хурдан мориор аархаж, алдар нэрээ дуудуулах хүсэл шуналтай. Харин энэ шуналын ард ачааг нь үүрдэг уяач, унаач хүүхэд байдаг ч алдар нэр, гавьяа шагнал нь зөөлөн суудалд тухалсан дарга нарынх байдаг нь утгагүй. УИХ-ын даргаасаа эхлээд гишүүд нь, сайд, дарга нар нь алдарт уяач гуншинтай байдаг нь үнэндээ бол инээдтэй хэрэг. Хурдан морины уяа сойлгийг нь тааруулж, өвөл зунгүй морьдыг нь малладаг тэр хүмүүс нь гавьяа шагналыг нь авах ёстой. Тэдэнд алдарт, манлай уяач цол илүү зохицно. Харин парламентын танхимд суучихаад уяач нэрээр дуудуулж суух нь ичмээр. Тиймээс улстөрч, уяач хоёрыг ялгаж салгаж өгөөрэй, Ерөнхийлөгч өө. Төр өгсөн бол бас буцаагаад авах ч эрхтэй.

Б.Учрал