Эрүүл мэндийн салбарынхан Сүхбаатарын талбайд суулт хийж байна. Энэ даваа гаригаас эхэлсэн суулт ажил хаялтын өмнөх сануулга аж. Эмч, эмнэлгийн ажилтнууд эрүүл мэндийн салбарт шударга үнэлэмж тогтоож, цалин нэмэхийг шаардаж буй юм.

Өнөөдрийн суултын үеэр эмч, сувилагч нар төв талбайд үсээ хусуулж, эсэргүүцлээ илэрхийллээ. Энэ үеэр Налайх дүүргийн Эрүүл мэндийн төвийн их эмч Б.Баттөгсөөс зарим зүйлийг тодрууллаа. Тэрбээр “Гасалсан салбарын гуниглал” шүлгийг бичиж, эрүүл мэндийн салбарынхны дуу хоолой болж буй юм.

-Таны шүлэг энэ суултын гол утга учрыг хэлжээ. Яагаад ийм шүлэг бичих болов?

- Би өөрөө яруу найрагч хүн учраас эмч, эмнэлгийн мэргэжилтнүүдийн өмнөөс дуугаръя, хүрэх ёстой хүмүүст нь хүрч магадгүй гэж үзээд “Гасалсан салбарын гуниглал” гэдэг шүлгийг бичсэн. Үүний өмнө би Эрүүгийн хуультай холбоотой төрийн шийдвэрийг эсэргүүцэж, “Гамтай эмчийн гашуудал” гэдэг шүлгийг зохиож байна.

Эрүүл мэндийн салбарын эмч, эмнэлгийн мэргэжилтнүүд цалин хөлсний маш доогуур, амьдрал хэцүү байгаа. Өрх толгойлсон олон эмэгтэйчүүд энэ салбарт ажиллаж байна. Гаднаасаа цагаан халад шигээ сайхан мэтээр төсөөлөгдөж харагдаж байгаа боловч хүн л учраас асуудал олон.

-Өнөөдрийн дундаж цалин хэд байгаа вэ? Хэд болгохын төлөө тэмцэж байна вэ?

-Цалингийн хэмжээнээс гадна манай эрүүл мэндийн салбарынхан бүгд цалингийн зээлтэй. Энэ зээлийн хүү маш өндөр байгаа учраас бид авсан цалингаа амьдралдаа зориулж, хэрэгцээгээ хангаж чадахгүй байна.  Эрүүл мэндийн салбарын дундаж цалин 300-500 мянган төгрөг байдаг. Талх 250 төгрөг байхад бидний цалин ийм л байсан. Талх 1500 төгрөг болоход бидний цалин энэ янзаараа л байна. Зөвхөн энэ салбар гэлтгүй Монгол Улсын төрийн албанд хөдөлмөр эрхэлж байгаа бүх хүний цалин үнэлэмжийг олон улсын жишигт хүргээсэй гэж хүсч байна. 60 сая малтай, байгалийн баялгаараа дэлхийд тавдугаарт ордог бид гуравхан саяулаа байж гуйлгачин байх ёстой юм бэ.

-Та үсээ хусууллаа. Юуг илэрхийлэв?

-Бид үнэний төлөө үсээ байтугай зүрхээ зориулах чадалтай, үнэний төлөө явж байгаа хүмүүс. Өнөөдөр тав, арвуулаа байгаа ч олуулаа болно.

-Өнөөдрийн суултын дараагийн арга хэмжээ юу байх бол?

-Тэрийг хэлэх боломжгүй.

Б.Учрал