АНУ-ын Камиллус хотноо амьдардаг Марк Ротондо, Кристина Ротондо нар найман жилийн турш гэрт нь амьдарч, тэжээлгэсэн хүүгээ гэрээсээ бүрмөсөн явуулахын тулд шүүхэд хандсан талаар “CNN” агентлаг мэдээллээ.
Нью Йорк хотын шүүхээс өдгөө 30 настай Майкл Ротондог эцэг, эхийнхээ гэрээс нэн даруй нүүх ёстой гэх шийдвэрийг гаргасан байна. Майкл 2010 онд ажлаасаа халагдаж, улмаар байрныхаа мөнгийг төлж, амьжиргаагаа залгуулах боломжгүй болсон учир эцэг, эх дээрээ иржээ.
Тэрбээр Камиллус хотноо нүүж ирсэнээс хойш ганц ч удаа ажил хийгээгүй гэнэ. “Тэр үргэлж л авдаг байсан. Ихэнх цагаа тоглож бас зурагт үзэхэд зориулдаг байсан” хэмээн Кристина ярьжээ.
Хүүгийнхээ үйлдэлд дургүйцсэн эцэг, эх нь өнгөрсөн хугацаанд гурван ч удаа түүнд зориулан захиа бичсэн аж. Майкл уг захиануудыг үл тоосон учир ноён, хатагтай Ротондо нар шүүхэд хандахад хүрчээ.
Эхний захиандаа тэд хүүгээ явахыг хүссэн бол дараагийн захиандаа гэрийг нь нэн даруй орхихыг шаарджээ. Харин сүүлийн захиандаа амьжиргаагаа дээшлүүлж, байр хөлслөхөд нь зориулан 1.100 ам.доллар өгөхөө амласан байна.
Майкл шүүхийн үеэр “Би захиа хүлээн авсанаас хойш хагас жил төрсөн гэртээ амьдрах эрхтэй. 2018 оны хоёрдугаар сарын 18-нд гурав дахь захиаг хүлээн авсан” гэж хэлжээ.
Тэрбээр шүүхэд ялагдал хүлээсэн учир хууль хүчнийхэн Марк, Кристина нарын гэрээс Майклын эд зүйлсийг гаргаж, бие даан амьдрахад нь дэмжлэг үзүүлэхээр болсон гэнэ.
Марк “Би хүссэн үедээ л түүнийг дуудах болно. Гэхдээ бараг дуудахгүй байхаа” гэж ярьжээ.
Б.Дэлгэрцэцэг
Уншиж байна |