Олон улсын эх үрсийн баярын өдрийг тохиолдуулан зургаан сайхан үр хүүхэд төрүүлж өсгөсөн Г.Однарантай ярилцлаа. Түүнийг Алдарт эхийн нэгдүгээр одонгоо хүртэх үед зургаан хүүхэд төрүүлсэн гэхээргүй залуу, халуун харагдаж байна хэмээн олон нийтийн хэрэгслээр гайхан, шагширч байсан нь саяхан.
-Юуны өмнө манай уншигчдад өөрийгөө танилцуулахгүй юу?
-Сайн байцгаана уу. Намайг Г.Однаран гэдэг. Одоо 41 настай. Би Архангай аймагт төрж, Төв аймгийн Баянхангай суманд өссөн.
-Анх хүүхэдтэй болсноо мэдээд хэрхэн хүлээж авч байв? Магадгүй амьдралын мартахын аргагүй мөчүүдийн нэгээхэн хэсэг энэ байх?
-Анхныхаа хүүг олчихоод ээж, аав, эмээ өвөөдөө хэлэхээс айгаад нуучихсан байсан юм. Нэг өдөр ээжээрээ толгой дээрээ ус хийлгэж байсан чинь ээж маань “Хүүш ээ хөхний чинь толгой борлочихсон байна шүү дээ. Жирэмсэн болчихсон юм уу” гэхээр нь хөөстэй толгойтойгоо гараад зугтчихсан. Гэртээ орж чаддаггүй. Эмээ хашааны завсраар дуудаад оруулж, ирээд “Бүхэл бүтэн хүн ирж байхад хэлсэнгүй. Алив охиноо үнсье” гээд тайвшируулж билээ. Би чинь эмээ өвөө хоёр дээрээ хоёрхон сартай ирж хүн болсон хүн шүү дээ.
-Хөөстэй үстэйгээ зугтааж байсан жаахан охин хэдий нь зургаан хүүхдийн ээж болжээ.
-Би 1996 онд хүүтэй болж, 2001, 2007 онд хоёр охиноо төрүүлсэн. Тухайн үед эмнэлэгт хүүхэд солигдсон тухай яриа гарч би хүүхдээ төрүүлчээд нүдээ салгалгүй хардагсан. Нөхөр маань хөдөө тээвэрт явчихдаг байхаасаа байхгүй нь их болохоор төрөхөөсөө өмнө цагаан сарын бууз, баншаа хөлдөөж, шөлнийхөө махыг хүртэл хөшиглөөд бэлдчихдэг байж билээ. Тэгээд 2012, 2013, 2014 онд жил дараалан төрж, гурван бага хүүгээ төрүүлсэн. Гурван ихэр юм шиг сайхан хүүтэй. Нэгнийг нь тэргэн дээр нь тавьж гаргачихаад нөгөө хоёроо гялс хувцаслаад салхинд гаргах, гурвуулаа зэрэг ханиад хүрч халуурч, ханьтайгаа шөнө нойргүй хонох үе байлаа. Цагаан сараар айл хэсэхэд нөгөө гурваа хувцаслаад нэг нэгээр нь томчуудад нь тэврүүлж гаргана. Би гэдэг хүн хөлс гоожчихсон, будаг урсчихсан явах энүүхэнд. Гурван жилийн дараа хоёрдугаар эмнэлэгт төрөх гээд очсон чинь сувилагч охин “Хүүе ээ та ахиад төрөх гэж байгаа юм уу” гэж байсан. Миний зургаан хүүхдийг эрүүл саруул сайхан төрүүлж өгсөн хоёрдугаар төрхийн хамт олонд их баярлаж, тэр эмнэлгийг шүтэж явдаг.
-Дэрсхэн хөвгүүдтэй байх сайхан биз. Тэд үймээний эзэд байх даа?
-Тэгэлгүй яахав. Одоо бага гурван хүү маань гараас гарсан. Том нь юу хийнэ, дуурайж гэр оронд мөнхийн инээд хөөр, уйлаан, шуугиантай байдаг. Би гурван хүүгээ худлаа ярьж болохгүй, хулгай хийж болохгүй, ядарсан хүнд тусалж яв гэх мэтээр зүйр үг, сургамж үг цээжлүүлдэг юм. Нэг удаа “Ядарсан хүн гэж ямар хүнийг хэлэх билээ” гэсэн чинь манай аав гэж хэлээд бөөн инээдэм болж билээ. Хань бид хоёр хамтдаа унтана гэж байхгүй. Бид хоёрыг өмчлөөд авчихна. Хааяа нэг эрхлэмээр болоод цуг хэвтэхээр “Аая ээж та дурлачихсан юм у” гээд л бид хоёрыг салгачихна. Гурван багийн дундах нь төрчихсөн байсан чинь том нь дүүгээ “Тэнэг, тэнэг” гэчихсэн зогсож байсан. Дүү нь гараад ирэхээр хүүхэд их өрөвдөлтэй болдог юм билээ. Жаахан анхараал суларвал сүүлийг нь ам руу нь чихчихсэн, өлгийтэй нь татаж унагах гээд л их юм болно /инээв.сур/.
-Том хүү нь одоо хэдтэй билээ? Олон хүүхэд төрүүлсэн гэж хэлэхээргүй ууган хүүтэйгээ үе тэнгийн мэт харагддаг.
-Том хүү маань 22 настай. Сэтгэл санаа тайван, архи, тамхи хэрэглэдэггүй, халамжтай сайн ханьтай болохоор овор багатай харагддаг байх. Гурван бага хүүгээ жил дараалан олчихоод их айж байсан. Ээж минь “Ламд үзүүллээ. Өвөө нь ирж байгаа юм байна, эмээ нь иржээ” гэх мэтээр гарга л гэдэг байсан. Би үр хөндөлт хийлгэж үзээгүй.
-Алдарт Эхийн 1,2 дугаар одон хүртсэн шүү дээ. Энэ таны хамгийн том бахархал болов уу?
-Ээж гэдэг эрхэм алдрыг хүртэж, алдарт эхийн 1,2 дугаар одонгоор энгэрээ мялаасандаа маш их баярлаж, бахархаж явдаг. Бурхан надад ийм сайхан бэлэг өгсөнд баярлаж, хүүхдүүдээ аз жаргалтай, эрдэм номтой, сайн хүн болгохын төлөө аав, ээж хоёр нь зүтгэж явдаг даа.
-Та хүүхдүүдээ хэн болж өсч, хүмүүжээсэй гэж хүсдэг вэ?
-Би үр хүүхдүүдээ хүн чанартай, мөн чанартай, эх орондоо хэрэгтэй эрдэм мэдлэгтэй сайн хүмүүс болоосой гэж хүсч, зүтгэж, залбирч явдаг даа.
-Эх, үрсийн баярын өдрийг хэрхэн тэмдэглэдэг вэ? Энэ жил хэрхэн баярлаж байна вэ?
-Гэр бүлээрээ агаар салхинд гарч ээж нь хээрийн шорлог амттай хоол хийж өгч өнгөрүүлдэг дээ. Энэ жил хөдөө ажиллаж байгаа. Одоо хүүхдүүд рүүгээ баярыг нь тэмдэглэхээр хот руу зорьж явна.Монголын бүх сайхан ээжүүддээ үр хүүхдэд нь эх үрсийн баярын мэндийг хүргэж, өвчин зовлонгүй эрүүл энх бүтэн байлгаж, аз жаргалаар бялхаж яваарай гэж ерөөе.
Ярилцсанд баярлалаа.
Г.Тэгшсүрэн