Зам тээврийн бодлогын зөвлөлөөс өнөөдөр шатахууны үнийг бууруулах шаардлагын талаар хэвлэлийн бага хурал хийлээ. Шатахууны үнийг тогтворжуулж, бууруулах шаардлагыг АН-ын Зам тээврийн бодлогын зөвлөл Засгийн газар болон эрх баригч МАН-д хүргүүлэхээ мэдэгдлээ. 

Өнгөрсөн 20 гаруй жилийн хугацаанд шатахууны үнийн савлагаа, өргөн хэрэглээний барааны үнийн өсөлт гээд нийгмийг бухимдуулсан, ард олныг ядууруулсан олон удаагийн сөрөг үзэгдлүүд гарсан. 2013-2016 онд шатахууны үнэ нэг ч төгрөгөөр өсөөгүй. Ийм тогтвортой үнийн орчин иргэд, бизнес эрхлэгчдэд  үнэхээр таатай байсан. Энэ үед “Шатахууны жижиглэнгийн худалдааны үнийг тогтворжуулах дэд хөтөлбөр” хэрэгжиж байсан.

Одоо шатахууны үнэ 700 төгрөгөөр нэмэгдчихсэн, дахиад ч нэмэгдэхээр байгаа юм. Шатахуун зарахгүй байна, хязгаарлалттай байна, 95 гэчихээд 92 шахаж байна, хэрэглээний барааны үнэ нэмэгдчихлээ гэх иргэдийн гомдол ихээр ирэх болсон талаар АН-ынхан хурлын үеэр хэлж байсан юм.

Мөн тэд  энэ сарын 9-ний өдрийн 12.30, 18.30 цагуудад төв замд нэг минутын турш дуут дохиогоо дуугаргаж эсрэгүүцэл илэрхийлэх аж. Шатахууны нэмэгдэлд тодорхой арга хэмжээ авахын төлөөх энэ тэмцэлд жолооч нарыг нэгдэхийг уриаллаа.

О.Төгөлдөрмаа