НҮБ-ын шинжээчид Мьянмарын армийн командлагч болон таван генералыг шашны цөөнх гэгддэг роханжи иргэдийн эсрэг геноцид буюу “Үндэс угсаа, арьс өнгө, шашин шүтлэг, үзэл бодлоор нь ялгаварлан гадуурхахаас гадна урьдаас төлөвлөж, системтэйгээр бөөнөөр устгах” хууль бус явуулсан хэмээж, шалгахыг хүссэн талаар “www.dailymail.co.uk” сайт мэдээллээ.
Армийнхан өнгөрсөн оны наймдугаар сард роханжи иргэдийн амьдардаг Ражин мужид цэргийн ажиллагаа явуулсан юм. Ойролцоогоор 700,000 иргэн Мьянмараас зугтаан, өдгөө Бангладешийн хил орчимд хүндхэн нөхцөлд амьдарч байна.
Зэвсэггүй роханжичуудын эсрэг хүч түрэмгийлэн тэмцэж буй армийнхан залуу охид ба бүсгүйчүүдийг хэрцгийгээр хүчирхийлэн, тамлан зовоосон гэх олон хэрэг гарчээ.
Бэлгийн хүчирхийллийн золиос болсон олон зуун охид, бүсгүйчүүд хүсээгүй хүүхдээ төрүүлэх нь нэмэгдсэн гэнэ. Тэд үр хөндөлт хийлгэх мөнгөгүй учир ийнхүү хүсээгүй хүүхдээ төрүүлжээ.
Мөн шинжээчид дээрх хүчингийн хэргээс гадна армийнхан роханжичуудыг бөөнөөр хядаж байсан олон баримтыг гартаа оруулсан гэнэ.
НҮБ өмнө Мьянмарын эрх баригчдын явуулж буй үйл ажиллагааг “Үндэстэнг устгах арга техник” хэмээн тайлбарласан юм.
Олон улсын шинжээчид хөөрхийлөлтэй роханжичуудыг хүчирхийлэн, бөөнөөр хядсан хэргийн гол буруутан бол Мьянмарын армийн ерөнхий командлагч, генерал Мин Аун Хлайн гэж мэдэгдлээ.
Б.Дэлгэрцэцэг
Уншиж байна |