ОХУ, Украин дахин зөрчилдөж эхэлжээ. Энэ талаар “CNN” агентлаг, “www.dailymail.co.uk” сайт мэдээллээ.

ОХУ-ын усан хилийг зөрчсөн хэмээн Украины хөлгүүдийг олзлоод буй юм. Уг үйл явдал өнгөрөгч амралтын өдөр болсон ба Украины тэнгисийн флотын гурван хөлөг Азовын тэнгисийг гатлан Мариуполь боомтод хүрэхээр явж байхдаа ОХУ-ын хилийг зөрчжээ. Уг үйл явдалтай холбогдуулан ОХУ-ын талаас хил зөрчсөн хөлгүүдийг олзолж, багийн 23 гишүүнийг нь баривчилсан байна.

Керчийн хоолойд болсон үйл явдалтай холбогдуулан Украины Ерөнхийлөгч Петр Порошенко Украины зарим бүс нутагт ЦЭРГИЙН ДЭГЛЭМ тогтоожээ. Энэхүү дэглэм зөвхөн ОХУ-тай залгаа орших бүс нутгуудад энэ сарын 28-наас 30 хоногийн хугацаанд хүчин төгөлдөр үйлчлэх гэнэ.

Анхандаа Ерөнхийлөгчийг уг дэглэмийг 60 хоногийн хугацаатай тогтоохоор шийдвэрлэсэн ч хэсэг хугацааны дараа хугацаагаа хоёр дахин багасгасан аж. Учир нь тус улсад удахгүй Ерөнхийлөгчийн сонгууль зохион байгуулагдах юм.

Порошенкогийн зарлигыг Дээд Рада дэмжин баталж, шаардлагатай гэж үзвэл “ОХУ-ын эсрэг хариу арга хэмжээ авахад бэлэн” гэлээ.

Ерөнхийлөгч украинчуудад хандан “Манай улсын аюулгүй байдалд ОХУ заналхийлж эхэллээ. ОХУ, Украины эсрэг хуурай замын цэргийн ажиллагаа явуулах эрсдэлтэй байна. Тиймээс ОХУ-тай хиллэх бүс нутагт онц байдал зарлаж, тус улсаас ирэх ямар ч үйлдлийг дайныг өдөөн турхирсан үйлдэл хэмээн үзэж, хариуг нь барих болно. Энэ бүхнийг батлах тагнуулын мэдээ надад байна ОХУ-ын цэргийнхэн Украины газар нутагт нэвтэрч, цэргийн ажиллагаа явуулах зорилготой. Тэд ч энэ боломжийг үргэлж хүлээдэг. Манай улсын хилээс ойролцоо хүчээ нэмэгдүүлж буйг батлах тагнуулын мэдээ ирсээр байгаа” гэж мэдэгджээ.

Энэхүү мэдэгдлийн дараа Киев дэх ОХУ-ын Элчин сайдын яамын гадна уурссан украинчууд дургүйцлээ илэрхийлэн, элчингийн барилга руу чулуу шидсэн аж.

Оросын тал, Украины хөлгүүд рүү гал нээх үед хэд хэдэн украинчууд бэртсэн гэнэ. Тэднийг эмнэлэгт хүргэсэн, эмчилгээ хийсэн эсэх нь тодорхойгүй байна. Хэрвээ цэргийнх нь алтан амь үрэгдсэн тохиолдолд ямар ч сануулгагүйгээр хариу гал нээхээ Порошенко мэдэгдлийнхээ үеэр онцлов. Украин “Зургаан цэрэг буудуулсан гэх мэдээллийг хүлээн авсан” гэж мэдэгджээ.

Европын холбоо зөрчилдөөнийг энхтайван ч аргаар шийдвэрлэхийг Москва, Киевд уриалсан бол НҮБ-ын Аюулгүй зөвлөл өчигдөр уг асуудлаар яаралтай хуралдаан зохион байгуулсан байна.  Украины хөлгүүд ОХУ-ын хилийг зөрчсөн гэдгийг батлах НОТОЛГОО бий гэдгээ илэрхийлээд, Украинд шийтгэл ноогдуулахыг шаарджээ.

ОХУ, Украины “Бердянск”, “Никополь”, “Яны Капу” гэх гурван хөлгийн олзолсон шалтгаанаа “Далайн эрх зүйн тухай НҮБ-ын 19, 21 дүгээр заалтыг зөрчиж, Хар тэнгисээс Керчийн хоолойн орчимд хөлгүүд ОХУ-ын хилийг зөрчихөөс гадна хууль ёсны шаардлагад хариу өгөхгүйгээр хөдөлгөөнөө үргэлжлүүлсэн болно” гэж тайлбарлажээ.

ОХУ-ын Ерөнхийлөгч хэвлэлийн төлөөлөгч Дмитрий Песков “ Энэ бол маш ноцтой үйл явдал. Бид харилцан нэг нэгнээ өдөөн хатгахгүйгээр учир байдлыг тайван, нухацтай хэлэлцэх учиртай” гэсэн бол ОХУ-ын Гадаад хэргийн сайд Сергей Лавров “Украин эхэлж олон улсын хуулийг зөрчлөө” гэж мэдэгдлээ.

АХ, ДҮҮС гэгддэг байсан хоёр улсын харилцаа 2014 оноос хөндийрсөн юм.

Украины газар нутгийн нэгээхэн хэсэг Крымийн хойгийг ОХУ эх газартаа хүчээр нэгтгэж, Оросын талыг баримтлагчид өнөөг хүртэл Украины зүүн хязгаарыг эзлэн түрэмгийлсээр байна.

Тухайн үед Крымийн хойгийн нийт иргэдийн 97 хувь нь Орост дагаар орохыг дэмжсэн ба уг хүсэлтийг Москва хүлээн авчээ. Мөн энэ оны эхээр ОХУ-аас Крымийн хойгийг холбосон 19 км гүүрийг нээсэн билээ. “Энэ бол эзлэн түрэмгийлэх явдал биш. Бид бүх нийтийн санал асуулгыг хүлээн зөвшөөрсөн явдал” гэж Москва мэдэгдэж байв.

Энэ үйл явдлаас гадна Украины зүүн хязгаарт осолдсон Малайзын “МН17” онгоцыг Оросын тал “БУК” гэх пуужингаар харвасан гэж Киев мэдээлснээс болж, хоёр улсын харилцаа жинхэнэ утгаараа хөндийрч, ДАЙСАН болсон юм.

Б.Дэлгэрцэцэг