Ардчилсан намын бүлэг хуралдаж, УИХ-ын дарга М.Энхболд, Ерөнхий сайд У.Хүрэлсүх нарт албан мэдэгдэл хүргүүлэхээр болжээ. Ингэхдээ УИХ-ын дарга М.Энхболдыг албан тушаалаа сайн дураараа өгч, 60 тэрбумын хэрэгт шалгуулах ёстой хэмээн үзжээ. Харин Ерөнхий сайд У.Хүрэлсүхэд стратегийн орд эзэмшсэн, концесс авсан, ЖДҮХС-аас зээл авсан албан тушаалтнуудад хариуцлага тооцох асуудлыг УИХ-д яаралтай оруулж ирэх шаардлагыг тавьж байна.
УИХ-ын гишүүн З.Нарантуяа “МАН-ын хагарал бол зөвхөн нэг намын тэмцэл гэж харагдахаа больсон. УИХ, Засгийн газар хоёр харилцахаа байж, үйл ажиллагаагаа явуулж чадахгүй хэмжээнд хүрсэн нь ҮАБ-ын түвшинд хүрсэн засаглалын хямрал руу чиглүүлж байна. Үүнийг зөвхөн өргөдөл хуулийн үндэслэл байхгүй гэсэн жижигхэн шалтгаанаар байгаад байвал цаашид төрийн ажил жинхэнэ утгаараа хямралд орно. Тиймээс УИХ-ын дарга хуулийн заалт барихгүйгээр Монголын төр, иргэдийг хүндэтгэж, өөрөө чөлөөлөгдөх өргөдлөө өгөх нь ёсзүйн хувьд зөв. Хэрвээ ингэж чадахгүй бол УИХ-ыг тараах Ерөнхийлөгчийн саналыг дэмжинэ. МАН ийм хэмжээнд хүргэхгүйгээр дотроо асуудлаа шийдэнэ гэж найдаж байна” гэсэн байр суурийг илэрхийллээ.
Б.Учрал