Хуульзүйн байнгын хорооны ирц бүрдээгүйгээс хуралдаан хойшиллоо. Үүнтэй холбогдуулан Хуульзүйн байнгын хорооны дарга Ш.Раднаасэдээс зарим зүйлийг тодруулав.

-Хуульзүйн байнгын хороогоор ямар асуудал хэлэлцэх байсан бэ?

-Эрүүгийн хуульд нэмэлт өөрчлөлт оруулах асуудлыг хэлэлцэхээр төлөвлөсөн байсан. Мөн дагаж мөрдөх журмын тухай хууль.

-УИХ-ын Дэгийн тухай хуульд өөрчлөлт оруулах Ерөнхийлөгчийн өргөн барьсан хуулийн төслийг хэлэлцэх үү?

-Энэ хуулийн төсөл манай байнгын хороогоор хэлэлцэгдэхгүй. Өмнө байсан зохицуулалтыг оруулж байгаа. Буруутгах асуудалгүй.

-Танай намын бүлэг хоёр талцаад, намрын чуулганы хугацаа дуусах дөхөж байна. Хэлэлцэх асуудлуудаа яах вэ?

-Намрын чуулган үргэлжлэн хуралдах байх.

-Засгийн газар орд газруудыг төрийн мэдэлд авч байна. Энэ тал дээр ямар байр суурьтай байна вэ?

-Хууль бус үйлдэл гаргасан бол төр хуулийн дагуу авах нь зөв. Гагцхүү үүний цаана хэн нэгний, гадна дотныхныг үргээсэн үйл ажиллагаа явуулах нь буруу. Би Засгийн газрын гишүүд нь  ийм зүйлд өөрсдөө очоод байх шаардлага байсан уу гэж бодож байна. АМХЭГ нь үйл ажиллагааг нь цуцлаад явна биз.

-УИХ-ын дарга албан тушаалаасаа чөлөөлөгдөөгүйгээс УИХ гацаад байна уу?

-УИХ-ын даргаас хамаарсан парламент гэж байхгүй. Дарга бол парламент биш. УИХ-ын 76 гишүүн байж парламент бүрдэнэ.

-УИХ-ыг тарах асуудалд ямар байр суурьтай байна вэ?

-УИХ-ын 51 гишүүн гарын үсэг зурж байж энэ асуудал хэлэлцэгдэнэ. Парламент эмзэг байж болохгүй. Ерөнхийлөгчийн засаглалтай байх ёстой, парламентын засаглалтай байх ёстой гэж ярьдаг. Миний байр суурь бол парламенын засаглал бол Монгол Улсын тусгаар тогтнол, аюулгүй байдлын баталгаа. Хоёр их гүрний дунд оршдог орны хувьд парламентын засаглал байх ёстой. Дарга өөрчилснөөс парламент нурдаггүй. Парламентыгөөрчлөх асуудал Үндсэн хуулиар хамгаалагдсан.

-Прокуророос УИХ-ын таван гишүүний бүрэн эрхийг түдгэлзүүлэх асуудал оруулсан уу?

-Би тэр тухай мэдэхгүй.

-“60 тэрбум”-ын асуудалд ҮХЦ ямар хугацаанд шийдвэр гаргах вэ?

-ҮХЦ хүлээж авснаас хойш 30 хоногийн дотор хэлэлцэх хуультай. Ямар хугацаанд шийдвэр гаргах нь ҮХЦ-ийн асуудал.

Н.Энх