Нийслэлийн Засаг даргын Тамгын газар, Онцгой байдлын ерөнхий газартай хамтран нийслэлд анх удаа нийслэлийн Гамшгаас хамгаалах иж бүрэн сургуулилалтыг гурван өдрийн турш зохион байгууллаа.
Монгол дэндүү амар тайван орон. Үүнийг гурван өдрийн сургалтад идэвхи муутай оролцсон зарим иргэдийн хэнэггүй зан харууллаа. Танил маань гудамжинд таараад “Маргааш найман баллын хүчтэй газар хөдлөлт болох юм гэнэ. Тэгээд Онцгойгийнхон бэлдэж байгаа юм байх” гэж хэнээс ч юм сонссон үгээ хээв нэгхэн хэлж орхив. Үнэхээр найман баллын хүчтэй газар хөдөлсөн бол тэр “Онцгойгийнхон бэлдсэн биз” гээд санаа амар сууж байх аж.
Уг нь энэ сургалтаар газар хөдлөлтийн урьдчилан таамаглаж болно. Гэвч чухам яг хэзээ гэдгийг хэн ч хэлж мэдэхгүй. Тиймээс хэн ч, хэзээ ч, хаана ч бэлэн байх ёстой. Хүн бүр ойрын хугацаанд хаа нэгтээ аялахгүй байлаа ч үүргэвч бэлдэж, түүндээ бичиг баримт, эмийн сан, удаан хугацаанд хадгалж болох гурав хоногийн хүнс, хүлээн авагч /радио/, гар чийдэн зэргийг хийж, гамшиг нүүрлэсэн үед хэрэглэхэд зориулан гэр, орондоо бэлэн байлгахыг зааж, хүн бүрийн санаа бодолд ягштал суулгахыг албаныхан эрмэлзсэн.
Нийслэлийн хэмжээнд гурван хоногийн турш ийнхүү бэлэн байдал зарлаж газар хөдлөлтийн үед иргэдийг аюулгүй талбайд цуглуулж, нүүлгэн шилжүүлэх сургуулилалт явуулсан нь Улаанбаатар хотод газар хөдлөлтийн аюул нүүрлээд байгаатай холбоотой.
Улаанбаатар хот газар хөдлөлтийн 7.5 баллын идэвхитэй бүсэд оршдог байна. Улаанбаатар хот орчмын Авдар уул, Эмээлт, Гүнжийн ам, Хустайн нуруу, Мөнгөнморьт сум гэсэн зургаан бүс газар хөдлөлтийн идэвхитэй бүсэд тооцогддог. Эдгээрээс Улаанбаатар хотод хамгийн ойр нь 15-20 км зайд, хол нь 212 км зайд оршиж байна. Эдгээр газарт 6.5 баллаас 8.5 баллын газар хөдлөх магадлалтай аж. Тухайн газруудад газар хөдлөхөд Улаанбаатар хотод мэдрэгдэх хүч нь 5.5-7.5 балл гэдгийг албаныхан хэлж байна.
“Жайка” төслөөс 2013 онд ОБЕГ-тай хамтран гаргасан газар хөдлөлтийн гамшгийн үнэлгээгээр Улаанбаатар хотод 6.5-7.6 баллын газар хөдлөлт болсон тохиолдолд нийт барилга байгууламжын 20-50 хувь нь нурж, 30-60 мянган хүн нас барж, 200-300 мянган хүн газар хөдлөлтийн гамшгийн хохирогч болох магадлалтай гэсэн тооцоог гаргажээ. Мөн 3-4 баллын газар хөдлөлтөд 29 ЕБС, 46 цэцэрлэг, 30 эмнэлэг нурах аюултай аж.
Эрсдэл бидэнд маш ойрхон байгааг энэхүү тоон судалгаанаас байгааг харж болно. Иймээс ч гамшгаас хамгаалах иж бүрэн сургуулилалтыг зохион байгуулж, иргэдэд мэдлэг мэдээлэл олгохыг чухалчлав.
Онцгой байдлын байгууллагын мэдээлснээр нүүн шилжих дадлага сургуульд 3200 гаруй нийтийн орон сууц, 120 гаруй мянган өрхийн 420 гаруй мянган иргэн оролцсон гэх урьдчилсан тоон мэдээлэл гарчээ.
Гамшгийн сургуулилалтад идэвхитэй оролцож “онц” сурсан нэгэн ч байна. Өглөө эртлэн босч хүүхдүүдээ дагуулан аюулгүйн талбайд бэлэн жагсаж, дараа нь гэртээ ирээд газар хөдлөлтийн үед хэрхэн өөрийгөө хамгаалах тухай хүүхдүүддээ зааж сургасан ээж байхад “муу ёрлолоо” гэх өндөр настантай ч таарлаа.
Г.Сүрэн