Монгол Улсын эрүүл мэндийн үйлчилгээнд Туяа эмчилгээний технологийн дэвшил-шугаман хурдасгуур аппаратыг нэвтрүүлээ.  Тус аппаратыг хүлээн авах ёслол өнөөдөр (2019.06.19) ХСҮТ-д боллоо. Энэхүү аппарат нь хорт хавдрыг цацрагаар эмчлэх төхөөрөмж аж. Хамгийн гол нь эрүүл эд эсийг гэмтээхгүйгээр эмчилнэ гэдгийг Эрүүл мэндийн сайд Д.Сарангэрэл хэллээ.

ХСҮТ-ийн захирал Г.Чинбүрэн “Туяа эмчилгээ бол хорт хавдрын эмчилгээний тулгуур хэсэг. Орчин тойрны эрүүл эдийг бага гэмтээж, тухайн хавдарт өндөр тунгаар туяа эмчилгээ хийх нь заавал мэс засал хийхгүйгээр тухайн эрхтнийг хадгалж, эмчлэх боломж бүрдэж байна. Тухайлбал, уушгины жижиг хавдрыг эмчлэхдээ заавал уушгийг тайрах шаардлагагүй болсон гэсэн үг. 

Дэлхийд хорт хавдрын эмчилгээний 60 хувийг туяа эмчилгээ эзэлдэг. Тиймээс энэ бол асар ач холбогдолтой төхөөрөмж” гэдгийг тодотгож байна.

Өмнө нь жилдээ 600 хүнд туяа эмчилгээ хийдэг байсан бол энэ тоног төхөөрөмж ашиглалтад орсноор 1000 болон нэмэгдэх аж.

Б.Болд