Монгол Улсад Онцгой байдлын байгууллага үүсч нэгдсэн тогтолцоонд шилжсэний 15 жилийн ойн түүхэн өдөр өнөөдөр тохиож байна. Энэ өдөрт зориулсан онцгой байдлын албаны хүндэтгэлийн жагсаал Сүхбаатарын талбайд боллоо. Ёслолын ажиллагаанд Ерөнхий сайд У.Хүрэлсүх, Шадар сайд Ө.Энхтүвшин нар оролцож, онцгой байдлын албаныханд баяр хүргэлээ. 

15 жилийн хугацаанд Онцгой байдлын байгууллагын алба хаагчид 17 012 эрдэнэт хүний амь нас, 310.4 тэрбум төгрөгийн эд хөрөнгийг авран хамгаалсан байна.

Үргэлжлүүлэн ойн баярын хурлын арга хэмжээ Соёлын төв өргөөнд болно. Мөн  албаны үйл ажиллагаа, алба хаагчдын ажил, мэргэжлийн онцлогийг иргэдэд танилцуулж, гамшиг ослоос урьдчилан сэргийлэх, амь нас, эд хөрөнгөө авран хамгаалах зөвлөмж мэдээллийг хүргэх, албаны хэмжээнд ашиглагдаж байгаа техник, тоног төхөөрөмжийг танилцуулах алба сурталчлах өдөрлөг 10:00-17:00 цагийн хооронд төв талбайд зохион байгуулагдана.