УИХ Үндсэн хуульд нэмэлт өөрчлөлт оруулах төслийн нэг дэх хэлэлцүүлгийг хийж, хэлэлцэхийг дэмжсэн. Тиймээс УИХ-ын гишүүд тойрогтоо ажиллан Үндсэн хуульд нэмэлт өөрчлөлт оруулах төслийн талаар иргэдэд мэдээлж, санал солилцлоо. Эдүгээ иргэдээс ирүүлсэн саналыг нэгтгэхээр УИХ-ын Тамгын газрын ажлын хэсэг ажиллаж байна. УИХ-ын дарга Г.Занданшатар өнөөдөр сэтгүүлчидтэй “Өглөөний цай” уулзалт хийж, Үндсэн хуульд нэмэлт өөрчлөлт оруулах төслийн талаар сэтгүүлчдийн асуултад хариуллаа. Тэрбээр:
-Ард түмэн өнөөдөр парламентын засаглалыг хүчтэй байна гэдэг. Үндсэн хуулиар парламентын зарим эрхийг хязгаарлаж байгаа. Хамгийн гол нь Ерөнхий сайдад үүрэг, хариуцлагыг нь үүрүүлж байгаа юм. Өнгөрсөн хугацаанд олон Засгийн газар солигдож ирсэн. Одоо бид задралаас нэгдэл рүү явах цаг үе тохиож байна. Үндсэн хуульд өөрчлөлт оруулах төслөөр “давхар дээл”-ийг тайлж, Ерөнхий сайдад танхимаа өөрөө бүрдүүлэх эрхийг өгч байгаа.
Мөн парламентын засаглалыг сайжруулах үүднээс гишүүдийн ирцэнд өөрчлөлт оруулж байна. Хуулийг батлахад хуралдаанд оролцсон гишүүдийн олонхиор бус нийт гишүүдийн олонхиор батлахаар заасан. 76 гишүүний олонхи нь 39 гишүүн хуралдаанд оролцсоноор ирц, бүрдэж асуудлаа хэлэлцэн батална. Өнөөдрийн мөрдөгдөж байгаа хуулиар хуралдаанд оролцсон гишүүдийнх олонхи гэхээр 20 гишүүн хууль баталж байна гэсэн үг.
Монгол Улсын Үндсэн хуульд “1.Монгол Улсад газар, түүний хэвлий, ой, ус, амьтан, ургамал болон байгалийн бусад баялаг гагцхүү ард түмний мэдэл, төрийн хамгаалалтад байна.
2.Монгол Улсын иргэдэд өмчлүүлснээс бусад газар, түүнчлэн газрын хэвлий, түүний баялаг, ой, усны нөөц, ан амьтан төрийн өмч мөн” гэж заасан. Энэ заалт хэвээрээ байгаа. Гэтэл ард түмний өвчийг төрийн өмч болгожээ гээд шүүмжилж байгаа. Энэ бол одоо ч хэрэгжиж байгаа заалт. Байгалийн баялагтай улс хэрхэн баян байдгийг Норвегийн Үндсэн хууль харуулдаг. Норвегит хүн бүр баян. Норвегит одоо байгаа нэг асуудал нь далай руугаа хаяж байгаа хаягдал. Байгалийн баялгийг хүн бүр хүртэж, тэгш шударгаар хуваарилах хэрэгтэй. Гэтэл манайд цөөхөн гэр бүлийн ашиг болоод байгаа. Дийлэнх иргэн амжиргааны түвшин доогуур амьдарч байна гэдгийг онцолж, сэтгүүлчдийн асуултад хариулсан юм.
Н.Энх
Уншиж байна |