"Улаанбаатар Сонгдо" эмнэлгийн ерөнхий захирал Б.Болдсайхан цаг үеийн асуудлаар өнөөдөр /2020.04.15/ сэтгүүлчдэд мэдээлэл хийлээ.
Тус эмнэлэгийн сэхээн амьдруулах тасагт хэвтэн эмчлүүлж байсан 88 настан болон амбулатороор үйлчлүүлсэн 40 гаруй насны иргэнээс тандалтын зорилгоор түргэвчилсэн оношлуураар шинжилгээ хийхэд COVID-19 вирус илэрсэн явдал олон нийтийг цочроосон. Гэвч дэлхий нийтээр хэрэглэж, албан ёсны оношлуур гэж үзээд буй PCR машинд сорьцийг шинжлэхэд COVID-19 халдвар илрээгүй буюу хариу сөрөг гарсан гэдгийг Эрүүл мэндийн яамнаас мэдээлсэн.
Олон нийтийг айлган, түгшээсэн энэхүү үйл явдалд "Улаанбаатар Сонгдо" эмнэлгийн ерөнхий захирал Б.Болдсайхан уучлал хүслээ. Гэхдээ уг хоёр иргэн COVID-19 халдвараар өвчлөөд эдгэрсэн байж болзошгүй гэдэг шинжлэх ухааны таамаглалыг дэвшүүлэв.