Жон Хопкинсийн их сургуулийн сайт дээр мэдээлснээр, 11 дүгээр сарын тавны байдлаар дэлхий даяар коронавирусийн халдвар авсан хүний тоо 48 саяыг давжээ. 

Тодруулбал, цар тахал дэгдсэнээс хойш халдвар авсан хүний нийт тоо 48 005 784 болсон байна. Коронавирусээр үүсгэгдсэн өвчний хүндрэлийн улмаас 1 224 111 хүн нас барсан бол 31 830 497 хүн эдгэрчээ. 

Халдварын тоогоор АНУ тэргүүлсэн хэвээр байна. Энэ улсад 9,4 сая хүн коронавирусийн халдвар авчээ. АНУ-ын араас, 8,3 сая халдварын тохиолдолтой Энэтхэг, 5,5 сая халдварын тохиолдолтой Бразил улс тус тус бичигдсэн байна.

Харин хойд хөрш ОХУ-д нийт халдварын тохиолдол 1 693 454 болж, 1 266 931 хүн эдгэрсэн бол 29 217 хүн нас баржээ.Тус улсад сүүлийн үед халдварын дэгдэлт эрс өсч байгаа бөгөөд өнгөрсөн хоногт 19 768 халдвар шинээр бүртгэгдсэн байна. 

Улмаар ОХУ-д халдвар эрчимтэй нэмэгдэж байгаатай холбогдуулан хязгаарлалтын арга хэмжээнүүдийг дахин авч хэрэгжүүлэн, Москва мужийн өндөр настнуудыг өөрийгөө тусгаарлах,  иргэдийг нийтийн тээврээр үйлчлүүлэхдээ амны хаалт зүүгээгүй бол торгох журам үйлчилж эхэлжээ. Түүнчлэн Москва хотын 6-11 дүгээр ангийн сурагчдын хичээлийг цахимаар орох хугацааг дахин сунгаж, 11 дүгээр сарын 22 хүртэл сурагчид цахимаар хичээллэхээр болсон байна. 

Г.Бямбасүрэн