Засгийн газрын ээлжит бус хуралдаанаар өнөөдөр  болж бүх нийтийн бэлэн байдлын зэргийг 2021 оны 05 дугаар сарын 08-ны өдрийн 06.00 цаг хүртэл сунгах  Улсын онцгой комиссын шийдвэрийг дэмжсэн билээ. Хөл хориог сунгасантай холбогдуулан авах арга хэмжээний талаар УОК-ын дарга С.Амарсайхан нар танилцуулж байна. УОК-ын дарга С.Амарсайхан: 

-Тавдугаар сарын 08-ны өдрийн 06:00 цаг хүртэл хөл хориог сунгаж байна. Сүүлийн 24 цагийн байдлаар нийтдээ 1200 гаруй тохиолдол бүртгэгдэж байна. Халдварын шинэ төрөл буюу мутацийн төрөл манай улсад урьдчилсан байдлаар бүртгэгдсэн. Энэ нь өвчлөл хурдтай нэмэгдэхийн үндэс болж байна. Үүнтэй зэрэгцээд вакцинжуулалтын ажлууд нийтдээ 160 гаруй цэгээр хийгдэж байна. Одооогийн байдлаар нийтдээ 43 мянган иргэн вакцинд хамрагдсан байна. 

Зургадугаар сарын нэгэн гэхэд вакцинжуулалтаа дуусгана. Шаардлагатай нөхцөлд вакцинжуулалтын цэгийн ажиллах цагийг 22.00 хүртэл сунгана гэлээ. Тэд мэдээлэл хийснийхээ дараа сэтгүүлчдийн асуултад хариулав. 

-Мутацийн шинэ төрөл нэмэгдлээ гэлээ. Энэ нь нийслэлд голомтлон тархсан уу?

ХӨСҮТ-ийн захирал н.Баттөр:

-Халдвар нэмэгдэхэд олон хүчин зүйл нөлөөлсөн. Хөл хорионы үед эрчим буураагүй. Нэн ялангуяа хоёрдугаар сарын хөл хорионы үеийнхтэй харьцуулахад буураагүй. Хөл хориогүй байсан бол өдөрт 3000-аар халдварын тоо бүртгэгдэх байсан. Мутацийн хэлбэрийн судалгааг японы туршлагаар хийж байгаа. Одоогийн байдлаар мутацилагдсан хэлбэр илрээгүй. ПСР-т суурилагдсан шинжилгээг урьдчилсан байдлаар 33 сорьцыг хамруулсан. Ингэхэд Турк улсаар ирсэн хүмүүсээс энэ шинж илэрсэн. Хүн амын дунд хийсэн судалгаанаас хоёр хүнд илэрсэн. Өнөөдрийн байдлаар хүн амын дунд тархсан гэж хэлэх үндэслэлгүй. 

-Нас баралт нэмэгдсэн нь уушгины аппартын дутагдалтайгаас болж байна уу?

-Нас баралт нэмэгдсэн нь уушгины аппаратаас болоогүй. 

-Өмнөх хөл хорионы үр дүн юу вэ?

Шадар сайд С.Амарсайхан: 

-Хөл хорио тогтоохоос аргагүй нөхцөл байдал үүссэн учраас тогтоосон. Иргэдийн оролцоо, хариуцлага дээр үндэслэж хөл хорионы үр дүнг гаргах ёстой.  Бид хөл хорио тогтоохдоо иргэдээ гэрийнхээ ойр салхилах боломжийг бүрдүүлсэн. Харамсалтай нь энэ нь мөрдөгдөхгүй байгаа. 

ЭМ-ийн сайд С.Энхболд:

-Вакцинжуулалтын өмнө эмчийн үзлэг хийж, асуумж авч байгаа. Өнгөрсөн хугацаанд судалгаа, тандалтууд хийсэн. Өнгөрсөн 14 хоногийн хугацаанд халдварын эрчим буурсан. Халдварын тоо 1000-аас дээш гараад байгаа нь ойрын хавьтал. Албан байгууллага, олон нийтийн газар халдвар тархахаас сэргийлсэн. Өнгөрсөн хугацаанд нас баралт нэлээн гарсан. Нас барсан иргэдийн гэр бүлд эмгэнэл илэрхийлье. Нас барсан иргэдийн дийлэнх нь суурь өвчтэй байсан. Бид байнга судалгаа шинжилгээ хийж байгаа. 

Шадар сайд С.Амарсайхан: 

-14 хоногийн хугацаанд аж ахуйн нэгжүүдэд чиглэсэн ямар бодлого баримтлах вэ? Хувийн хэвшилд ажилладаг,  өдрийн орлогоороо амьдардаг иргэдийн амьжиргаа хүндэрлээ. 

-10 их наядын цогц хөтөлбөрийг хэрэгжүүлэх хүрээнд аж ахуйн нэгжүүдэд хөнгөлөлттэй зээл олгоод явж байгаа. Харамсалтай нь өнөөдрийн аргагүй нөхцөлд байна. Засгийн газар эдийн засгаа зогсоохгүй тал дээр ажиллана. Хөл хорионы хугацаанд иргэдэд мөнгө олгох асуудал яригдаагүй. 

Засгийн газрын хэвлэлийн албаны дарга Ц.Ганзориг:

-"Карантин-14" контентийг долоон телевиз хамтран хийж байгаа гэсэн. Үүнд Засгийн газар ямар ч төлбөр төлөөгүй болно. 

Н.Нягт