Италийн Бари хотод зохион байгуулалттай гэмт хэрэгтэй тэмцэх хууль сахиулах байгууллагынхны өргөн цар хүрээтэй ажиллагааны явцад 100 орчим хүн баривчлагдсан талаар РИА Новости агентлаг мэдээлжээ. 

Энэ тусгай ажиллагааг цагдаагийн тусгай хэлтсийнхэн болон орон нутгийн Мафитай тэмцэх газрын бүрэлдэхүүн хамтран зохион байгуулсан байна. Эх сурвалжийн мэдээлснээр, Бари хот болон мужид гэмт хэргийн үйл ажиллагааг бүхэлд нь хянадаг "Стришульо" мафийн хчүирхэг бүлэглэлийн эсрэг гол цохилтыг өгсөн байна.

Тусгай ажиллагааны явцад 96 хүнийг баривчилж, гурван хүнийг гэрийн хорионд оруулсан байна. Тэдгээрийг мафийн үйл ажиллагаа эрхэлсэн, хар тамхины наймаа, бусдын биед хүнд гэмтэл учруулсан, зэвсэг хууль бусаар хадгалсан, биедээ авч явсан болон бусад гэмт хэргүүдэд буруутгаж байгаа аж. Энэ хэргээр нийтдээ 147 хүнд хэрэг үүсгэн шалгаж байгаа юм байна. 2015 оноос хойш мафийн бүлэглэлийнхий үйл ажиллагааг мөрдөж, баримт нотолгоотой болсноор ийнхүү баривчлах ажиллагаа явуулсан гэнэ.

Италийн мафийн олон  "загалмайлсан эцэг" өдгөө шоронд байгаа ч мафи урьдын адил хүчирхэг хэвээр байгаа аж. Италийн мафи хар тамхи, тамхи, зэвсгийн хууль бус наймааны зах зээлийг гартаа барьдгийн дээр Италийн эдийн засгийн олон чухал салбарыг хяналтандаа байлгаж, улс төр тэр дундаа Италийн өмнөд хэсэгт ихээхэн нөлдөөлдөг юм байна. Мафийн бүлэглэлүүдийн жил бүрийн орлого 50 сая евро орчим байдаг аж. 

Италид таван үндсэн мафийн нэгдэл байдаг юм байна. Сицилид Коза Ностра, Калабри мужид Ндрангета, Неапол болон түүний ойр орчимд каморра, Сардин аралд "Сакра корона унита" бүлэглэл үйл ажиллагаа явуулдаг аж.

Г.Бямбасүрэн