Ханхүү Харри ээжийгээ алдсанаас үүдэлтэй уй гашуугаа мартахын тулд согтууруулах ундаа ихээр хэрэглэдэг байсан гэнэ. Тэрбээр энэ талаараа Опра Уинфригийн "Чиний олж харахгүй би" нэртэй нэвтрүүлэгт оролцох үеэрээ ярьжээ.
"Баасан эсвэл бямба гарагийн орой би бусад хүмүүс долоо хоногт уух хэмжээний согтууруулах ундааг нэг л өдөрт уучихдаг байсан. Би уух дуртайдаа ч биш уй гашуугаа дарах гэж уудаг байсан" хэмээн ханхүү Харри ярьжээ.
Түүний өгүүлснээр, хатан хааны гэр бүл Диана гүнжийн үхлийн талаар ярих хүсэлгүй байсан тул ханхүү "чимээгүй гашууддаг" байсан гэнэ. Улмаар ээжийнхээ үхлээс болж ихээхэн уур бухимдалтай болсон аж.
Ханхүү Харри сэтгэлийн шаналал болон хэвлэлийнхний дарамтыг өөрөө даван туулчихна гэж гэрийнхэн нь бодож байсан ч байдал гүнзгийрч, хамгийн хэцүү үе нь 28-32 насны үед тохиосон гэнэ. Тухайн үед цочрол, хүчтэй түгшүүрийг даван туулахад хүнд байсан гэж ханхүү Харри ярьжээ.
"Би костюм өмсөж, зангиа зүүх бүртээ дүр эсгэж, "тоглохоор" явж, толинд хараад өөрөө өөртөө "за явцгаая" гэж хэлэх шаардлагатай болдог байлаа" хэмээн Харри өгүүлсэн байна.
Чухамхүү энэ мэдрэмжээ арилгахын тулд согтууруулах ундаа эсвэл хар тамхи хэрэглэхэд бэлэн байсан талаараа Харри ярьжээ.
Мөн энэ ярилцлагын үеэрээ ханхүү Харри ирээдүйн эхнэр, жүжигчин Меган Марклтай уулзсан нь амьдралынх нь эргэлт болсон мөч байсан гэж ярьсан байна. Харри сэтгэлийн зовлонгоо даван туулахаар сэтгэлзүйн эмчилгээнд явж эхэлсэн 2016 онд "сохор болзоо"-ны үеэр тэд танилцжээ.
Энд дуулгахад, Диана гүнж 1997 онд Парис хотноо зам тээврийн осолд орж, амиа алдсан юм. Тэр үед Диана гүнжийн бага хүү Харри 12 настай байжээ.
Г.Бямбасүрэн
Уншиж байна |