Ерөнхийлөгч У.Хүрэлсүх ОБЕГ-ын үйл ажиллагаатай танилцаж байна. Түүнийг ОБЕГ-ын бие бүрэлдэхүүн угтан авч, хошууч генерал Г.Ариунбуян аврах ажиллагааны нисдэг тэргийн талаар танилцуулга хийлээ.
Агаараас эрэн хайх, аврах ажиллагааны нисдэг тэрэг 230-240 км цагийн хурдтай, дотроо 8-9 хүний бүрэлдэхүүнтэй баг тээвэрлэх боломжтой юм байна. Өөрийнхөө цэнэгээр гурван цаг тасралтгүй ниснэ. Өөрөөр хэлбэл Улаанбаатараас Баянхонгор хүртэл нислэг үйлдэх боломжтой. Одоогоор нисэх бүрэлдэхүүн, инженер техникийн ажилчид, авиа инженерүүдийг бэлтгэж байна. Нийтдээ 12 нисэгчийг дотооддоо бэлтгэж байна. Тэдний 8 нь шинээр бэлтгэгдэж байгаа бол 4 нь туршлагатай нисэгч гэдгийг ОБЕГ-ын дарга танилцууллаа.
Үргэлжлүүлэн Ерөнхийлөгч У.Хүрэлсүх онцгой байдлын байгууллагын албан хаагчидтай уулзалт хийж, үг хэллээ.
Ерөнхийлөгч У.Хүрэлсүх: Онцгой байдлын алба гайхамшигтай сайхан алба. Би та бүхнээрээ их бахархаж явдаг. Та бүхэн бол бурханы элч. Та бүхэн бусдын сайн сайхан, амь нас, улс орны үндэсний аюулгүй байдлын төлөө, ард түмний амар амгалан байдлы сахин хамгаалахын төлөө өөрсдийн амь нас, гэр бүл, үр хүүхдээ орхиж, өдөр шөнөгүй хүчин зүтгэж байгаа хамт олон. Тиймээс та бүхний алдар гавьяагаар бахархахаас өөр арга байхгүй.
Би энэ албыг удирдаж, анхны сайдаар ажиллаж байсан. 2004 онд онцгой байдлын албаны анхны сайдаар томилогдож байсан цаг үеэ эргэн дурсахад үнэхээр сайхан байна. Энэ бол миний хувь хүний хувьд ч түүхэн үйл явдал. Хэдийгээр би зэвсэгт хүчнээс гаралтай, үндэсний аюулгүй байдлын чиглэлээр бэлтгэгдсэн хүн ч би өөрийгөө онцгой байдлын албанаас төрж гарсан Ерөнхийлөгч, төрийн тэргүүн гэж бодож явдаг.
...Та бүхэн аврагч нар. Эх дэлхийгээ хамгийн сайн мэдэрдэг хүмүүс бол та бүхэн. Би ОБЕГ-ын дарга, генерал Ариунбуянд бүх аймгийн онцгой байдлын албад дэргэдээ үрсэлгээний аж ахуй байгуул гэсэн үүрэг өглөө. Тэндээ үржүүлсэн модоо нөхөн сэргээх, ойн санг нэмэгдүүлэх, албан хаагчдын хашаанд тарихаас эхлээд ойг нэмэгдүүлэхэд онцгой байдлын алба хичээл зүтгэл гаргах ёстой. Энэ бол миний өгч байгаа үүрэг.
Дараагийн асуудал нь далайд живсэн автомашинуудыг татаж гаргах ажлыг үе шаттайгаар хийж хэрэгжүүлэх ёстой. 2024 он гэхэд Хөвсгөл далайн ёроолд живсэн бүх техник хэрэгслийг татан гаргана. Энэ үүргийг цаг хугацаанд нь осол авааргүй гүйцэтгэхийг онцгой байдлын албанд даалгав.
Б.Хэрлэн