Оростой хил залгаа, Украины Сумск мужийн өмнөд хэсэгт байх Ахтырка хотод артиллерийн цохилтод  өртөн Украины 70 цэрэг амь үрэгджээ. Энэ талаар мужийн захирагч Дмитрий Жвицкий мэдээлж байсан бол мягмар гарагийн өглөө "Украина 24" сувгийн орон нутаг дахь сурвалжлагч мэдээлсэн байна. 

Сэтгүүлчийн мэдээлснээр, цэргийн ангийн барилгын нурангийг цэвэрлэх ажил одоо ч үргэлжилж байгаа гэнэ. Ахтыркад сүүлийн өдрүүдэд байлдаан өрнөж, гудамжинд "оросуудын цогцос олноороо байна" хэмээн Дмитрий Жвицкий мэдээлж байв.

Өнгөрсөн шөнө болсон үйл явдлуудаас товчлон хүргэвэл, Украины өмнөд хэсэгт байх Персон хотыг Оросын цэргүүд бүрэн бүсэлсэн бөгөөд хүнс тасалдаж эхэлсэн талаар ВВС мэдээлжээ. 

Харин Киев болон Харьков хотуудыг Украины зэвсэгт хүчин хяналтдаа байлгаж байна. Гэхдээ Киев орчимд урт цэргийн цуваа ажиглагдсан гэж ВВС дамжуулсан байна. Энэ мэдээлэл гарахаас өмнө CNN агентлаг хиймэл дагуулын зурагнаас харахад Оросын цэргийн цуваа 40 бээр урттай байгааг мэдээлсэн юм. Өөрөөр хэлбэл Киев орчимд 64 км урт үргэлжлэх Оросын цэргийн цуваа байгаа аж.