ОХУ, Украины ээлжит хэлэлцээ даваа гарагт болж, нэг цаг гаруй үргэлжилсэн бөгөөд үүний дараа ажлын хэсгүүд ажлаа үргэлжлүүлсэн талаар Украины төлөөлөгчдийн бүрэлдэхүүнд багтсан Давид Арахамия мэдэгджээ. Энэ хэлэлцээ ямар үр дүнд хүрэв, хоёр талын хэлэлцээнд ахиц гарав уу? 

Хэлэлцээ эхэлсэн нь

Хоёрдугаар сарын 28-ны өдөр буюу Оросын цэргүүд Украин руу довтолсноос хойших тав дахь өдөр талуудын анхны хэлэлцээ Беларусийн нутаг дэвсгэр дээр болсон юм.

Москвагийн талаас ирсэн төлөөлөгчдийг Оросын Ерөнхийлөгчийн туслах Владимир Мединский ахалсан. Төлөөлөгчдийн бүрэлдэхүүнд Оросын Гадаад хэргийн дэд сайд Андрей Руденко, Беларусь дахь Оросын Элчин сайд Борис Грызлов, Батлан хамгаалахын дэд сайд Александр Фомин, Төрийн Думын олон улсын хорооны дарга Леонид Слуцкий нар багтсан юм.

Харин Кеивийн талаас Батлан хамгаалахын сайд Алексей Резников, "Ард түмний зарц" фракцийн тэргүүн Давид Арахамия, Батлан хамгаалахын сайд Андрей Резников, Ерөнхийлөгчийн захиргааны тэргүүн Михаил Подоляк нар Украиныг төлөөлж байлаа.

Эхний шатны хэлэлцээ төдийлөн амжилттай болоогүйн дээр талууд ч дэлгэрэнгүй мэдээлэл өгөхөөс татгалзаж байлаа.

Ингээд гуравдугаар сарын нэгний өдөр Украины Ерөнхийлөгч Владимир Зеленский Путинтэй шууд хэлэлцээ хийхэд бэлэгн байа гэж мэдэгдсэн бол Кремль энэ саналаас шууд татгалзаагүй ч "одоо цаг нь арай эрт" гэсэн байр суурь илэрхийлж байв. 

Хоёр дахь шатны хэлэлцээ гуравдугаар сарын гуравны өдөр мөн л Беларусийн нутаг дэвсгэр дээр болж талууд энгийн иргэдийг нүүлгэн шилжүүлэхэд зориулан хүмүүнлэгийн коридор байгуулахаар тохиролцсон юм. Харин гуравдугаар сарын долооны өдөр Беловежийн төгөлд болсон гурав дахь шатны хэлэлцээгээр талууд мөн л үр дүнд хүрээгүй, хүмүүнлэгийн коридор байгуулах тал дээр багахан ахиц гарсан гэж мэдээлж байлаа.

Энэ үеэр Турк улс санаачилгыг гартаа авч, гуравдугаар сарын 10-ны өдөр Анталья хотод Украин, Оросын Гадаад хэргийн сайд нарын уулзалтыг зохион байгуулсан юм. Гэсэн ч энэ хэлэлцээ мөн л үр дүнд хүрээгүй.

Шинэ хэлэлцээ буюу талуудын шаардлага 

Гуравдугаар сарын 21-ний өдөр Украин, Орос улс дахиад л дээд төвшний яриа хэлэлцээтэй холбоотой мэдэгдэл хийсэн юм. Путин Оросыг сүйрлээс аврах цорын ганц боломж нь шууд хэлэлцээ гэж Зеленский мэдэгдсэн бол Кремлийн талаас "тохиролцоонд хүрээгүй цагт уулзалт болохгүй" гэсэн байр суурийг илэрхийлсэн. 

Хоёр тал энэ удаад дахин цахим хэлбэрээр хуралдаж, 1,5 цаг гаруй хэлэлцжээ. Уулзалтын дараа мөн л дэлгэрэнгүй мэдээллийг хоёр тал өгсөнгүй. Хэд хоногийн өмнө Владимир Зеленский хэлэлцээний явцын талаар тайлбарлахдаа телевиз, радио эсвэл фейсбүүкээр ярихын оронд чимээгүйхэн ажиллах нь зөв зүйтэй хэмээн онцолж байсан юм.

Төлөөлөгчид хоёр талын байр суурийг тохиролцох хүртэл хэлэлцээний агуулгыг нийтэд зарлахгүй гэж тохиролцсон талаар хэлэлцэгчид удаа дараа мэдэгдэж байлаа. Гэхдээ Украины тал ямар шаардлага тавьж байгаа талаар Михаил Подоляк хэвлэлд өгсөн ярилцлагадаа онцолж байв.

"Хэлэлцээний ширээнд төрөл бүрийн саналууд маш олон байгаа. Тэр дундаа улс төрийн байдлаар, мөн цэргийн байдлаар нөхцөл байдлыг зохицуулах санал ч байгаа. Тодруулбал, гал зогсоох, цэргээ гаргахтай холбоотой саналууд гэсэн үг" хэмээн Подоляк Оросын КоммерсантЪ сонинд өгсөн ярилцлагадаа онцолж байв. Түүнчлэн Подолякийн онцолсноор, цэргийн ажиллагааны улмаас учирсан дэд бүтцийн асар их хохирлыг Украины талд нөхөн төлөх механизм бий болгох боломжийн талаар хэлэлцэж байгаа, Украины тал ОХУ-аас нөхөн төлбөр авах бодолтой байгаа гэж "КоммерсантЪ" бичиж байлаа. 

Москвагийн тавьсан шаардлагуудын дунд "үндсэрхэг үзэлтнүүдийг үгүй болгох" гэсэн шаардлага багтаж байгаа. Харин одоо энэ шаардлагыг тавихгүй байгаа гэж Подоляк өгүүлж байв. Оросын Гадаад хэргийн яамны албан ёсны төлөөлөгч Мария Захарова энэ сарын эхээр мэдэгдэл хийхдээ Москва Украины эрх баригчдыг солих бодолгүй, Оросын цэргүүд Украиныг эзлэх төлөвлөгөөгүй хэмээн онцолж байсан юм. Гуравдугаар сарын 16-ны өдөр ОХУ-ын  Ерөнхийлөгчийн хэвлэлийн төлөөлөгч Дмитрий Песков мэдэгдэл хийхдээ Украиныг Австри эсвэл Швед хувилбараар цэрэгжээгүй, төвийг сахьсан улс болгох талаарх асуудлыг хэлэлцэж байгааг онцолж байв.

Г.Бямбасүрэн