Хонх дуугарахаар дамар нь таг гэдэг үг Өмнөговь аймагт биелэлээ олж байна. Нүүрсээ зөөж, төсвөө тэтгэх том мөрөөдөлтэй эрх баригч хүчний бодлогыг дизель түлшний хомстол таслан зогсоож байх жишээний.
БНХАУ-ын хувьд ТЭГ КОВИД бодлогоо үргэлжлүүлж, хэзээ хилээ хааж, хөл хорио тогтоох нь тодорхойгүй нөхцөл байдалд байгаа. Гэхдээ өнгөрсөн саруудад нүүрс тээвэрлэлтийн ажил жигдрэх шатандаа орж, экспорт нэмэгдэж байгаа мэдээллийг албаныхан өгсөн. Гэвч Өмнөговь, түүний дотор гол экспортыг хийж байгаа Цогтцэцийд дизель түлш хомстол үүсэж, нүүрс тээврийн компаниуд "ТЭГ ЗОГСОЛТ" хийхэд хүрсэн байна. Энэхүү хомстолыг хэрхэн яаж зохицуулж байгаа талаар Уул уурхай яамнаас тодруулахад тодорхой мэдээлэл өгсөнгүй.
“Эрдэнэс Тавантолгой” ХК-д Засгийн газрын онцгой бүрэн эрхт төлөөлөгчөөр томилогдсон Сангийн яамны Төрийн нарийн бичгийн дарга Ж.Ганбат энэ оны эцэс гэхэд 500 сая ам.долларын орлого төвлөрүүлэх төлөвлөгөө гарган ажлаа эхлүүлсэн. Гэвч Тавантолгойн уурхайгаас Цагаанхад чиглэлд ачилт хийх тээврийн хэрэгслүүд түлшгүй байгаагаас энэ төлөвлөгөө биелэх эсэх нь эргэлзээтэй болж байна.
П.ГОО
| Уншиж байна |