ОХУ хоёрдугаар сарын 24-ний өдөр "цэргийн тусгай ажиллагаа" нэрийн дор Украины нутаг руу халдаж, өнөөгийн дайныг дэгдээгээд даруй 10 сарын нүүрийг үзээд байна. Оросын тал энэ дайнд ихээхэн хохирол амссаны улмаас бие бүрэлдэхүүнээ нөхөх зорилгоор есдүгээр сарын сүүлээр хэсэгчилсэн дайчилгаа зарласны дээр эрүүгийн хуулиндаа өөрчлөлт оруулж, тушаал биелүүлэх, байлдахаас татгалзсан цэргийн алба хаагчдад эрүүгийн хэрэг үүсгэн шийтгэхээр болсон юм. Тэр үеэс хойш байлдахаас татгалзсан хэргээр тэнсэн харгалзах, торгуулийн ял шийтгэл амссан тохиолдол багагүй гарч байсан бол энэ удаад байлдахаас татгалзсаныхаа төлөө хорих ялаар шийтгүүлсэн хэрэг Камчаткад гарчээ.

"Эрх чөлөө" радиогийн мэдээлснээр, Камчатка дахь 35 дугаар цэргийн гарнизоны шүүх Украин дахь байлдааны ажиллагаанд оролцохоос татгалзсан цэргийн алба хаагч Алексей Бреусовт нэг жил найман сарын хорих ял оноожээ.  Түүнийг цэргийн эсвэл байлдааны ажиллагаанд оролцохоос татгалзсан тухай эрүүгийн зүйл ангиар шийтгэсэн байна. Алексей Бреусовыг 10 дугаар сарын зургааны өдөр цэргийн мөрдөн шалгах хэлтэст хүргэх үед тэрбээр байлдааны бүс рүү явахаас татгалзсан гэнэ.

Ингэснээр түүнийг Оросын Зэвсэгт хүчний дүрэм, Оросын армийн "сахилгын эрхзүй"-г зөрчсөн гэж шүүх үзжээ. Алексей Бреусов цэргийн жинхэнэ алба хаагч эсвэл дайчилгааны хүрээнд дайчлагдсан иргэн байсан эсэх талаарх тодорхой мэдээлэл гараагүй байна. Түүний өмгөөлөгчид шүүхийн шийдвэрийг давж заалдан Номхон далайн флотын шүүхэд ханджээ.

Г.Бямбасүрэн