Өнгөрсөн нэгдүгээр сард намрын чуулган хаалтаа хийхтэй зэрэгцэн хоёр гишүүн бүрэн эрхээсээ түдгэлзэхээр УИХ-ын даргад хүсэлтээ хүргүүлсэн. Тэд бол өнгөрсөн оны төгсгөлд олон нийтийн шүүмжлэлийг дагуулсан нүүрсний хулгайн хэргээр хууль хяналтын байгууллагад шалгуулах шаардлага үүссэн гишүүд юм. Тодруулбал, нүүрсний хулгайн хэрэгтэй холбоотойгоор УИХ-ын гишүүн Ж.Мөнхбат, УИХ-ын гишүүн, Хөдөлмөр нийгмийн хамгааллын сайд Т.Аюурсайхан нар бүрэн эрхээсээ түдгэлзэх хүсэлтийг УИХ-д гаргасан. Тэдний хүсэлтийг ирэх сарын 15-нд нээлтээ хийх хаврын чуулганаар хэлэлцэнэ. 

УИХ-ын гишүүн Ж.Мөнхбатын хувьд хоёр шалтгаанаар буюу өндөр настай ээжийгээ гадаадад эмчлүүлэх шаардлагатай, нэр холбогдоод байгаа нүүрсний хулгайн асуудлаар бүрэн эрхээсээ татгалзаж, энгийн иргэний хувиар шалгуулахаар ийнхүү УИХ-ын даргад хүсэлтээ хүргүүлсэн. Харин УИХ-ын гишүүн, Хөдөлмөр нийгмийн хамгааллын сайд Т.Аюурсайхан Улсын Их Хурлын гишүүний бүрэн эрх, халдашгүй байдлаас татгалзаж байж албан тушаалын аливаа нөлөөлөл, саад тотгоргүйгээр зохих ёсоор шалгуулж, хууль, шүүхийн өмнө үнэн мөнөө тогтоолгох хүсэлтэй байгаа илэрхийлсэн юм.

Ирэх сард парламент хоёр гишүүнээ явуулах боломж асуудлыг хэлэлцэнэ. Гэхдээ Ерөнхий сайд өнгөрсөн 19-нд МҮОНРТ-ийн “Онцлох зочин” нэвтрүүлэгт оролцох үеэрээ "УИХ-ын гишүүний бүрэн эрхээсээ түдгэлзэн, хуулийн байгууллагаар шалгуулах гишүүдийн тоо хоёроор тогтохгүй" хэмээн мэдэгдсэн юм. Ирэх өдрүүдэд хэн нь парламентыг орхих вэ гэх асуудал анхаарал татах нь ээ.

П.ГОО