Засгийн газрын өнөөдрийн хуралдааны шийдвэрийн талаар ХНХ-ын сайд Х.Булгантуяа мэдээлэл өглөө. Тэрбээр “2022 оны байдлаар 225 000 албан хаагч төсвөөс цалинжиж байна. Тэдний 152.2 мянга буюу 67.6 хувийг төрийн үйлчилгээний ажилчид эзэлж байна. 152.2 мянган албан хаагчийн 65.3 хувь нь боловсрол, шинжлэх ухаан, соёл, эрүүл мэндийн салбарт ажиллаж байна. Бусад нь төрийн нийтлэг үйлчилгээнд ажиллаж байна.

Төрийн албан хаагчдын цалин хувийн хэвшлийн дундаж цалингаас 400 орчим мянган төгрөгөөр бага байдаг.

Төрийн албан хаагчдын цалинг инфляцитай уялдуулан 2017 онд 4 хувиар, 2018, 2019, 2020  онд 8 хувиар нэмэгдүүлсэн. Цар тахлаас үүдэн 2021, 2022 онд төрийн албан хаагчдын цалинг нэмж чадаагүй.

Төрийн үйлчилгээний албан хаагчид их бухимдалтай байна. Хамгийн бага цалинг соёлын салбарынхан авч байна. Төрийн тусгай албан хаагчдаас цагдаа нар өндөр цалинтай.

Төрийн албан хаагчдын цалин, нийгмийн баталгааг салбарын 30 гаруй хуулиар зохицуулдаг. Тухайн салбарын хууль сайн батлагдвал салбарынхан илүү цалин, хангамж авдаг. Нийслэлийн эрхзүйн байдлын тухай хуулиар нийслэлийн өөрийн албан хаагчдын цалинг ялгаатай тогтоох боломжтой болсон. Ингэснээр нийслэлийн албан хаагчдын цалин орон нутгаас өндөр болсон.

Төрийн байгууллагуудын албан хаагчдын цалин хөрөөний ир шиг маш их ялгаатай байгаа нь ажиллах хүчний хомстолд хүргэсэн.

Үүнтэй холбоотойгоор төрийн үйлчилгээний албан хаагчдын хэт ялгаатай цалинг тэгшитгэх байр суурьтай байна. Төрийн нийтлэг үйлчилгээний албан хаагчдын цалин хөдөлмөрийн хөлсний доод хэмжээнээс багахан өндөр. Үүнийг нэмэхээр тооцоо хийж байгаа”-г мэдээлэв.

Төсвийн тодотголоор нэн тэргүүнд эрүүл мэнд, соёл, биеийн тамирын салбарын цалинг тэгшитгэн нэмэх аж. 

Б.Хэрлэн