Сайд, дарга нар шинээр томилогдох сайхан, тэд мөрөөдлөө харамгүй хуваалцдаг. Мэдээж, мөрөөдөл гэгээлэг, өнгөтэй өөдтэй. Хотын шинэхэн мэр Х.Нямбаатар ч нийслэлийн ойн өдрөөр мөрөөдлөө танилцуулав. Түүний мөрөөдөл дотор өнөөх метро бас л байна. Энэ бол нийслэлчүүдийн хувьд мөнхийн мөрөөдөл. Сая гаруй хүн амтай, дэлхийн метрополис хотын тоонд орсон Улаанбаатар метротой болох ёстой гэсэн иргэдийн хүлээлт ч тасраагүй. Тиймдээ ч хотын даргын суудалд суусан бүхэн метро амалж, гоё зураг танилцуулдаг. Бүр шав тавьсан дарга ч бий.

Гэвч Улаанбаатар хот өнгөрсөн хугацаанд яагаад метротой болоогүй, дарга нарын мөрөөдөл яагаад биелүүлээгүйг хотын өнөөгийн дарга Х.Нямбаатар хэлээд өглөө. Тэрбээр “Улаанбаатар хотын автозамын түгжрэлийг  бууруулах хамгийн том бөгөөд зоригтой шийдэл бол метро. Хотын үе үеийн дарга нар метро болон масс тээврийн хэрэгсэлтэй болох амбицтай, мөрөөдөлтэй байсан боловч ТЭЗҮ, санхүүгийн нөхцөл байдал, улс төрийн дарамт шахалтаас болж бодлого нь нуран унаж байсан” гэв. Товчхондоо хотын экс мэрүүдэд улс төрийн дэмжлэг дутжээ. Тэд улс төрийн бяргүй байж.

Харин Х.Нямбаатарт улс төрийн дэмжлэг хангалттай бий. Тэр Ерөнхий сайдын албан ёсны томилгоотой хотын анхны дарга байх. Тиймдээ ч Ерөнхий сайд Л.Оюун-Эрдэнэ хотын даргын тамгыг өөрийн биеэр албан ёсоор гардуулж, “Засгийн газар нийслэлээ бүрэн бүрэлдэхүүнээрээ дэмжиж ажиллана” гэж хэлсэн. Засгийн газрын тэргүүн, эрх баригч намын дарга Л.Оюун-Эрдэнэ хотын дарга Х.Нямбаатарын бат найдвартай ар тал болохоо, бусдын эдлээгүй улс төрийн дэмжлэгийг үзүүлэхээ ил тодоор хэлээд өгсөн.

Тэгэхээр одоо Х.Нямбаатар мөрөөдлөө биелүүлэх л үлдэж байна. Тэр Улаанбаатар хотод 2024 оноос гурван шугам бүхий метро төсөл эхлүүлэх том амбицтай байгаагаа зарласан. Ажил гүйцэтгэгчээр БНХАУ-ын төрийн өмчит компаниудыг сонгохоор эхний шатны яриа хэлэлцээ хоёр улсын Засгийн газрын тэргүүн нарын хооронд өрнөснийг ч дуулгалаа. БНХАУ-ын метро байгуулдаг төрийн өмчит компаниуд Улаанбаатар хотод метро байгуулахаар гэрээ үзэглэх өдрийг хүлээх л үлдэж байна.

Тэр бас метро байгуулах санхүүжилтээ хаанаас босгохоо ч тодорхой болгожээ. Хотын дарга асан Д.Сумъяабазарын эхлүүлж, гацаанд орсон уул уурхайг хөдөлгөж, нийслэлийн томоохон төслүүдийн санхүүжилтийг босгохоо мэдэгдэж байна. Гацсан, удааширсан төслийг хөдөлгөх туршлагатай гэдгээ дуулгахаа ч мартсангүй.

Хотын үе үеийн дарга нарын адил Х.Нямбаатарт ч метро байгуулах том амбиц байна. Харин тэднээс ялгаатай нь Х.Нямбаатарт улс төрийн том дэмжлэг бий. Тэр үүнийг ашиглаж чадах эсэхийг цаг хугацаа харуулна. Хэрвээ Х.Нямбаатар хэнд ч олдож байгаагүй энэ дэмжлэгийг ашиглаж, Улаанбаатар хотыг метротой болгочихвол түүний нэр түүхэнд үлдэнэ. Хэдэн арван жил ярианаас цааш хэтрээгүй метро нийслэлийн гудамж замаар яваад эхэлбэл хотын даргын амбиц, нийслэлчүүдийн мөрөөдөл биеллээ л гэсэн үг. Харин тэр Ерөнхий сайдын итгэл найдварыг дааж, улс төрийн дэмжлэгийг ашиглаж чадах болов уу?!

Б.Хэрлэн