Монгол Улсын Ерөнхийлөгчийн зарлигаар дуучин Д.Отгонжаргалыг Монгол Улсын Гавьяат Жүжигчин цолоор шагналаа. Тэрбээр шагналаа гардаж авсны дараагаар Монголын ард түмэнд баярын сэтгэгдлээсээ хуваалцлаа. 

МУГЖ Д.Отгонжаргал "Өнгөрсөн амралтын өдрөөр шагнал авна гэдгээ мэдсэн. Энэхүү эрхэм шагналыг хүртсэн минь үнэхээр нэр төрийн хэрэг байлаа. Уран бүтээлийг минь сонсдог, дэмжиж урам өгдөг хүмүүс миний үзэгч, сонсогчид байдаг. Тэд нартаа одоо байгаагаасаа илүү чанартай, илүү хөдөлмөрөөр бүтсэн уран бүтээлүүдийг насан туршдаа бэлэг барих нь хамгийн том зорилго юм байна гэж дотроо бодож бодлоо. Өнгөрсөн, одоо, ирээдүйд миний дэргэд байсан хүмүүстээ маш их баярлалаа" хэмээн сэтгэгдлээ хуваалцлаа. 

МУГЖ Д.Отгонжаргалын ээж Т.Жүгдэр "Миний охин ард түмний өмнө хийсэн хөдөлмөрөө үнэлүүлж эрхэм шагналыг хүртсэнд нь үнэхээр баярлаж байна. Би охиныхоо бүх дуунд хайртай бас дуртай. Шагнал авч байгаа гэдгийг нь сонсоод охиноороо бахархах, ээж хүн болсондоо мөн маш их талархаж хүлээж авсан. Охин минь Монголынхоо ард түмний чихийг үргэлж баясгаж яваарай" хэмээв.