Америкийн алдарт рэпер Снуп Догг мэргэжлээ түр сольж, өөр салбарт хүч үзэх болжээ. Тодруулбал, түүнийг Парисын олимпын үеэр тусгай сурвалжлагчаар ажиллана гэж Америкийн NBC суваг мэдээлсэн байна. 

Өдгөө 52 настай рэпер Снуп Догг Парисын олимпын үеэр NBC сувгийн тусгай сурвалжлагчаар ажиллан, тэмцээн уралдааны үеэр тамирчдаас ярилцлага авах аж. Тэрбээр телевизийн эфирээр хөтлөгч Майк Тирикотой хамт гарч, тамирчид, тэдний гэр бүлийнхэнтэй ярилцах бөгөөд Снуп Доггийн сурвалжлагуудыг NBC, Peacock сувгуудаар дамжуулах юм байна. 

Энд дуулгахад, XXXIII Зуны олимп 2024 оны долдугаар сарын 26-наас наймдугаар сарын 11-ний хооронд болох юм. Зуны олимпыг зохион байгуулах хотуудын албан ёсны хүсэлтийг 2015 оны нэгдүгээр сарын 15-ны өдрөөс эхлэн хүлээн авч, 2017 оны есдүгээр сарын 13-ны өдөр Олон улсын олимпын хороо мэдэгдэл хийж, XXXIII Зуны олимпын нийслэлээр Парис хотыг зарласан. Парис хот өмнө нь 1900 болон 1924 онуудад Зуны олимпыг зохион байгуулж байв.

Г.Бямбасүрэн