Дотоодын зах зээл дээрх түлшний үнийг тогтоон барих үүднээс бензин, дизель түлшний экспортыг тодорхой хугацаагаар хязгаарлаж байсан ОХУ дахин ийм алхам хийхээр болжээ.

Тодруулбал, 2024 оны гуравдугаар сарын нэгний өдрөөс эхлэн хагас жилийн хугацаанд бензиний экспортыг хориглох шийдвэрийг ОХУ-ын Засгийн газар гаргасан байна. Энэ шийдвэрийг ОХУ-ын Ерөнхий сайд Михаил Мишустин дэмжсэн гэж холбогдох эх сурвалжаас авсан мэдээлэлтэйгээр РБК агентлаг дамжуулжээ.

Тун удахгүй Оросын зах зээл дээр түлшний эрэлт нэмэгдэх улирал ирэх учраас бензиний экспортыг хязгаарлах саналыг ОХУ-ын шадар сайд Александр Новак Ерөнхий сайдад тавьсан аж.

Гэхдээ энэ удаад авч хэрэгжүүлэх хориг нь Евразийн эдийн засгийн холбооны гишүүн орнууд, Монгол, Узбекистан, Абхази болон Өмнөд Осети рүү нийлүүлэх бензинд хамаарахгүй гэнэ.

Эргэн сануулахад, 2023 онд Оросын Засгийн газар түлшний экспортод хязгаарлалт тавьж байлаа. Энэ улсад түлшний бөөний болон жижиглэн худалдааны үнэ эрс өссөний улмаас есдүгээр сарын 21-ний өдрөөс эхлэн хориг тавьж байв.

Г.Бямбасүрэн