Ерөнхийлөгчийн Тамгын газрын дарга асан З.Энхболд, УИХ-ын гишүүн Б.Энх-Амгалан нарт холбогдох хэргийн шүүх хурал өнөөдөр өндөрлөж, дөнгөж сая шийдвэрээ гаргалаа. Шүүхээс тэдэнд тус бүрт нь 40 сая төгрөгийн торгууль оноов. Мөн нийтийн албан тушаалд ажиллах эрхийг таван жилээр хаслаа.

Шүүхийн шийдвэрийн талаар З.Энхболд “Сүхбаатар дүүргийн шүүх олон хоног хуралдаж, шийдвэрээ сая гаргалаа. Би гэм буруугүй. Хаа байсан 2019 онд Б.Энх-Амгалан сайдын гаргасан тушаалыг намайг хатгаж гаргасан гэж яллаж байна. Давж заалдана.

Би өнөөдөр шүүхээс ял авч байна гэж үзэхгүй байна. Эрдэнэс Тавантолгойг Монголын ард түмэнд авч үлдээсний хариуг бүлэглэл надаас авч байна. Прокурорын гаргасан гомдол явсаар байгаад өнөөдөр шүүхийн шийдвэр цаасан дээр бууж байна.

Б.Энх-Амгалан сайд яаман дээрээ ямар тушаал гаргаж, хэнд давуу эрх олгож байгааг би мэдэх боломжгүй. Сая л шүүх дээр танилцаж, үүнээс хойш ярьж байхаар утсаа солилцлоо. Хаа нэг газар хэн нэгэн тушаал гаргахад хэн нэгнийг хатгагч гэж яллах нь хэтэрч байна. Шүүхийн дараагийн шат энэ алдааг засах байх.

Эрдэнэс Тавантолгойг авахыг санаархаж бүтээгүй бүлэглэлийн гол зорилго нь намайг 2024 оны УИХ-ын сонгуульд нэр дэвшүүлэхгүй, улс төрд ажиллаж болохгүй таван жил гэсэн ял өгүүлж байна. Энэ хэрэг 2019.07 дугаар үйлдэгдээд дууссан хэрэг. Хөөн хэлэлцэх хугацаа нь дууссан, хохирол байхгүй. Сонгуульд нэр дэвшүүлэхгүй, улс төр ажиллуулахгүй таван жилийнхээ ялыг өглөө. Яаж зүгээр байхав гээд 40 сая төгрөгийн торгууль тавьж байна. Би аль алийг нь хүлээн зөвшөөрөхгүй. Давж заалдах шатны шүүхэд үнэн зөв нь олдох байх гэж найдаж байна.

Эрдэнэс Тавантолгойг Хятад-Монголын хамтарсан компанид өгөөгүйн төлөө өс хонзон авсан ялыг надад шүүх биш бүлэглэл оноож байна. Үүнийг Монголын ард түмэн мэдэж аваарай.

2022 оны 12 дугаар сард нүүрсний гэх хэргээр хоёр сар мөрдөн байцаагаад, тэрийгээ нотолж чадахгүй хаасан. Лам олдохгүй бол буцахдаа зална гэгчээр Б.Энх-Амгалан сайдын 2019 оны хоёр тушаал гаргахад хатгасан гэж байна. Энэ бүхнийг тогтоохгүйгээр бүлэглэлийн даалгавараар ял өгсөнд маш их харамсаж байна" гэсэн байр суурийг илэрхийлэв.