Авто тээврийн хэрэгслийн Ерөнхий шаардлагад тавигдах MNS 4598/2020 стандартад заасан тээврийн хэрэгслийн бүх жингийн зөвшөөрөгдөх дээд хэмжээнээс хэтэрсэн, задрах боломжгүй ачаа тээвэрлэлтийг 2024.03.20-ноос 2024.04.20 хүртэл зогсоохоор болжээ.

Энэ хугацаанд автозамын даац, ачаа даах чадвар огцом буурдаг учраас даац хэтэрсэн, овор ихтэй ачааны тээврийг түр зогсоож байгаа аж. Зам тээврийн хөгжлийн төв, АТҮТ, тээврийн цагдаагийн алба, орон нутгийн авто тээвэр болон зам хариуцагч байгууллагууд энэ нэг сарын хугацаанд улсын хэмжээнд төлөвлөгөөт шалгалт хийж, тээврийг хянах юм байна.

Үйлдвэрийн том тоног төхөөрөмжүүд, цахилгаан станцын мотор зэргийг задалж, дахин угсрах боломжгүй. Үйлдвэрийн лацтай тээвэрлэх шаардлагатай энэ тоног төхөөрөмжүүдийг Засгийн газрын тогтоолоор нэг удаагийн зөвшөөрлөөр тээвэрлэдэг юм байна. Засгийн газрын тогтоол өнгөрсөн оны 10 дугаар сараас мөрдөгдөж эхэлсэн бөгөөд энэ хугацаанд автозамын санд 451 сая төгрөгийн төлбөр хураамж төвлөрчээ.