Монголбанкны захирлуудын зөвлөл баасаг гарагт хуралдаад бодлогын хүүг 0.5 хувиар өсгөж, 12.75 хувьд хүргэх шийдвэр гаргажээ.
Үндэсний статистикийн хорооноос 2012 оны хоёрдугаар сарын байдлаар хэрэглээний үнийн индексээр хэмжсэн инфляци улсын хэмжээнд жилийн 12.5, Улаанбаатар хотынх жилийн 13.3 хувьд хүрснийг мэдээлсэн.
Мах, махан бүтээгдэхүүний үнэ оны эхнээс 29.6 хувиар өсч, Улаанбаатар хотын эхний хоёр сарын инфляци 58 хувийг бүрдүүлжээ. Мөн 2012 оны эхний хоёр сарын байдлаар шатахууны үнэ 15.6 хувиар өссөн байна.
Иймээс инфляцийг хязгаарлах, гадаад валюттай харьцах төгрөгийн ханшид ирэх дарамтыг бууруулах, макро эдийн засгийн тогтвортой байдлыг хамгаалах зорилгоор мөнгөний бодлогыг чангаруулах арга хэмжээ авчээ.