Британийн Премьер лигийн 29-р тойргийн эхний дөрвөн тоглолт болж өнгөрлөө. Ньюкастл Норвичийг 1:0-ээр, Сванси Фулхэмийг 3:0-ээр тус тус хожиж, Уиган Уэст Бромвич 1:1-ээр тэнцсэн билээ. Харин өчигдөр орой болсон Манчестер Юнайтед болон Уолверхэмптон Уондерерс клубын тоглолт олны анхаарлыг татаж байлаа. Эн тэнцүү, ширүүн тоглолт үзүүлнэ гэдэг утгаараа бус нэг нь лигийг тэргүүлэх байраа энэ тойрогт хадгалж үлдэх үү, нөгөө нь лигийн баян ходоодоос дээшлэж чадах нь уу гэсэн асуултын хариуг энэ тоглолтоос авч чадах байсан учраас. Олон тойрог лигийг тэргүүлж явсан Манчестер Ситиг ардаа оруулж ганцхан оноогоор хошуучилж яваа Манчестер Юнайтедынхан энэ тоглолтод лигийн хамгийн муу амжиллтай багийг ялж 4 онооны зөрүү үүсгэх нь амин чухал. Тэр үүргээ ч Улаан чөтгөрүүд амжилттай биелүүлж чадлаа. Тэд өрсөлдөгчийнхөө талбай дээр 5:0-ээр ялалт байгууллаа. Тоглолтын эхнээс л Сэр Алексын цэргүүд идэвхтэй байж улмаар Жонатан Эванс 21, Антонио Валенсия 43, Данни Уэлбек 45+1 минутад гоолдсоноор эхний үеийн цаг дуусахад тооны харьцаа 3:0 болсон юм. Мөн шар хуудсаар торгуулсан Уолвесийн тоглогч Роналд Зубар дахин алдаа гаргаж багийхнаа хөөдсөн юм. Ийнхүү бүх талаар илүүрхсэн Улаан чөтгөрүүд дараагийн үед Чичаритогийн хоёр гоолоор 5:0-ийн харьцаагаар гайхалтай ялалт байгууллаа. Лигийн 1-рт яваа баг 20-рт яваа клубыг хожсон гэсэн үг. Тиймээс хамгаалалт, ур чадварын зөрүү үнэхээр ялгарч байсан юм. Энэ тойрогт Манчестер Ситигийн хувьд хүчтэй өрсөлдөгч Челситэй нүүр тулна. Сүүлийн үед Челси клуб Аваргуудын лигийн шөвгийн наймд гайхалтай тоглолтын ачаар үлдэж чадсан ба энэ нь дасгалжуулагчаа алдан олон хүнд тоглолтын улмаас шоконд ороод байсан Лондоны клубын тоглогчдын сэтгэлзүйн байдал, эрч хүчний хувьд өндөр болгоод байгаа. Лигийнхээ эхний дөрөвт бичигдэхийн тулд урдаа яваа Арсеналыг гүйцэх амин шаардлага нь ч тэдэнд үлдсэн тойргуудад хожигдох эрх үлдээгээгүй гэхэд болно. Тиймээс 49 оноотой Челси 22-нд болох Манчестер Сититэй хожих тоглолтод хожно л гэж зүтгэнэ. Тэдний хувьд тэнцээ авсан ч гурван онооы зөрүүтэй буй Арсеналаас тасрах аюул их. Нөгөөтэйгүүр 66 оноотой яваа Манчестер Ситигийн хувьд тэргүүлэгчийнхээ байрлалыг эргүүлж авахын тулд Челсиг хожих хэрэгтэй. Өчигдөр орой байгуулсан хожлынхоо ачаар Манчестер Юнайтед 70 оноотой болж тэднээс 4 онооны зөрүүтэй болоод байгаа. Тиймээс Манчестер Ситигийн хувьд лигийн аваргын төлөөх өрсөлдөөнд үлдэе л гэвэл энэ удаа Челсиг хожих ёстой болно. Хожвол эргээд МанЮ-гаас 1 онооны зөрүүтэй болж чадах юм.

Man Utd	29	70
Man City	28	66
Tottenham	28	53
Arsenal	28	52
Chelsea	28	49
Newcastle	29	47
Liverpool	28	42
Swansea	29	39
Sunderland	28	37
Everton	28	37
Fulham	29	36
West Brom	29	36
Norwich	29	36
Stoke	28	36
Aston Villa	28	33
Blackburn	28	25
Bolton	28	23
QPR	28	22
Wigan	29	22
Wolves	29	22

О.Нар