Хууль зүй, дотоод хэргийн сайдыг огцрруулах асуудлыг УИХ-ын нэгдсэн чуулганаар хэлэлцлээ. Энэ талаархи УИХ-ын гишүүн Ц.Сэдванчигийн байр суурийг сонслоо.
-Өнөөдрийн УИХ-ын нэгдсэн чуулганаар Хууль зүй, дотоод хэргийн сайд Ц.Нямдоржийг огцруулах эсэх асуудлыг хэлэлцэж, Засгийн газрын гишүүнээс нь огцруулахгүй гэсэн дүгнэлтэд хүрлээ. Та энэ асуудалд ямар байр сууринаас хандаж байгаа вэ?
-Ардчилсан намын бүлгийн гишүүд Ц.Нямдорж сайдыг огцруулах нь зүйтэй гэдэг дээр санал нэгдсэн. Энэ асуудлыг хэлэлцэхтэй холбоотойгоор бид гадагшаа, дотогшоо явах томиллолтоо хүртэл нэгдсэн байдлаар хойшлуулж байна. Ийм байдлаар л энэ асуудалд ач холбогдол өгч байгаа. Миний хувьд Монгол, Японы хооронд дипломат харилцаа тогтоосны 40 жилийн ой тохиож байгааг угтан Японд их том синфозиумд оролцох байсан. Энэ арга хэмжээгээ хойшлуулж, бүлгээс өгсөн үүрэг даалгаврыг биелүүлэх гээд байж байна. Хууль зүй, дотоод хэргийн сайд Ц.Нямдоржийг гэхээс илүү манай улсад хууль хэрэгжихгүй, шударга ёс гэж байхгүй, эрүүгийн нөхцөл байдал их хүнд, хууль зүйн салбарын ажилд бүхэлд нь ард иргэд сэтгэл дундуур байгаа. Тиймээс бид энэ удаагийн экс Ерөнхийлөгчийг баривчилсантай холбож бус хууль зүйн салбарын ажил урагш явахгүй байгааг асуудал болгон уг салбарыг 20 гаруй жил манлайлж яваа хүнтэй асуудлыг ярьж байна. Өнгөрсөн хугацаанд манайд эрүүгийн нөхцөл хүндэрч, нийгэм маань их хэрцгий болж байна. Хүний амь нас эрсдэж байна гэдэг мэдээлэл нь хүний дасал болсон мэдээлэл байх ёсгүй. Гэтэл манайд хүний амь зүй бусаар үрэгдлээ гэдэг мэдээлэл нэг их айхтар сэртхийлгэж иргэдэд хүрэхээ больсон. Төрсөн хүүхэд нь эцэг, эхийгээ хөнөөсөн, гэр орноор нь ч сүйтгэлээ гээд л аймар мэдээллүүд гарч байна. Ц.Нямдорж сайдын хувьд сүүлийн 20 гаруй жил энэ салбарыг тэргүүлж ажилласан. Энэ агуулгаар нь би шударга зүйл гэж байдаг бол Ц.Нямдорж уг албан тушаалд тохирохгүй гэж үзэж байгаа.
-Өнөөдрийн хуралдааны үеэр гишүүдийн зүгээс Ц.Нямдорж сайдаас энэ талын олон асуудлыг асуусан. Үүнд Хууль зүйн сайдын өгч байгаа тайлбаруудыг та юу гэж дүгнэсэн бэ?
-Асуултад хариулж байгаа хүн өөрийнхөө үнэлэмжээр л асуудалд хандана. Тэндээс дүгнэлт хийхэд хэцүү л дээ. Бодит байдал дээр юу болж байгаа нь чухал. Цахим үнэмлэхээр сонгууль явуулах, Иргэний бүртгэлийн газар болж байгаа халаа, сэлгээ, цагдаа, шүүхийн байгууллагын дарга, цэргийн асуудал ч гарч ирж байна. Тийм асуудал руу яагаад оролцоод байгаа нь тодорхойгүй байна.
С.Жигүүр